Pa termin e udhëzim, mjafton vetëm një telefonatë dhe secila grua e Kosovës mund të marrë një shërbim gjinekologjik në Qendrën e Mirëqenies së Gruas, shkruan KOHA.
Kjo qendër ka afro 20 vjet që është funksionale në objektin e Qendrës Kryesore të Mjekësisë Familjare në Prishtinë dhe i dedikohet secilës grua që ka nevojë për këshilla të përgjithshme dhe ndihmë mjekësore specialistike. Por, në realitet pak shfrytëzohet nga to.
Edhe pse secila vizitë shëndetësore është me një kosto tejet të ulët, e madje përcjellja e shtatzënisë është shërbim falas, pak gra vendosin që këto shërbime t’i kërkojnë në këtë qendër.
Mundesh me e lexu edhe...
“Kjo qendër ekziston që 17 vjet dhe që nga momenti i parë kemi ofruar shërbime për secilën grua, të moshës së re, shtatzëna e kushdo që ka nevojë. Aktualisht jemi 4 gjinekologë, gratë duhet caktuar një termin dhe ne jemi në shërbimin e tyre, po ashtu një shërbim shumë i veçantë është ajo e PAP testit që është një analizë që ndihmon në arritjen e të dhënave të shumta”, thekson Erzen Begolli, gjinekolog në Qendrën e Mirëqenies së Gruas.
Jo vetëm në raste dhimbjeje e urgjence, në këtë qendër vajzat dhe nënat e reja mund edhe të këshillohen për çfarëdo paqartësie që mund të kenë. Aty janë të krijuara klasat në grupe dhe secila grua rrëfen përvojën e saj. E nga mamia marrin përgjigje profesionale.
“Në momentin që vjen një grua për shërbim duhet caktuar terminin, e më pas gjinekologun, po ashtu e kemi edhe këshillimoren që secila prej tyre mund të informohet rreth planifikimit të shtatzënisë, përgatitja psikike për shtatzëni. Kjo qendër është themeluar për gruan dhe të tilla në Kosovë janë 2-3 javë jo më shumë”, thotë Begolli.
Përveç që nënat mund të zgjedhin gjinekologun tek i cili dëshirojnë ta përcjellin procesin e shtatzënisë, në raste të ndryshme mund edhe ta ndërrojnë mjekun, kjo falë sistemit informativ që gjinekologët kanë qasje në të.
“Jemi dy gjinekolog burra dhe dy gjinekologe gra, kudo që gruaja ndjehet më mirë mund të përcjellë shtatzëninë tek gjinekolog, po ashtu ka të drejtë të bëj ndërrimin e gjinekologut mjafton vetëm një deklaratë më arsyen dhe më pas mund të bëhet ndërrimi. E falë sistemit informativ ne mundemi të shikojmë qartë se çfarë lloj analizash dhe si ka ecë deri më tani shëndeti i gruas”, deklaron Begolli.
Shërbimet që ofrohen në këtë qendër janë të ngjashme me ato private, e madje edhe pajisjet janë nga më të avancuarat. Ata thonë se gratë nga gjitha vendet e Kosovës mund të vijnë për të kryer shërbime brenda qendrës, me shërbim cilësor e pa shpenzime të mëdha.
“Shërbimet janë me terminë, zakonisht presin 1 deri në 2 javë, por shërbimet tona janë të përafërta me ato që ofrohen nëpër ordinanca private. Pajisjet i kemi shumë të mira dhe të avancuara, ultrazëri, mikroskop, CTG, në 4 ordinanca gjinekologjike jemi ne që ofrojmë ambient të rehatshëm për secilën grua dhe më e rëndësishmja mund të vijë çdo grua e Kosovës për të marr shërbim nga ne e jo vetëm ato në Prishtinë”, shton Begolli.
Përveç shërbimit gjinekologjik, këshillimorja është e qasshme për secilën grua ku mamitë ofrojnë informacione për shqetësimet që mund t’i kenë. Sipas mamive, janë rreth 150 gra brenda muajit që marrin këshilla. Pjesa më e madhe janë gra të cilat presin për herë të parë të marrin epitetin e nënës dhe këto situata janë ende të panjohura për to.
Ato thonë se edhe burrat janë të mirëpritur gjithashtu, por deri tani nuk kanë pasur raste që dikush ta ketë shprehur dëshirën të informohet paraprakisht për procesin e shtatzënisë së gruas së tyre apo edhe të marrin informacionet e duhura në mënyrë që të jenë të përgatitur kur fëmija i tyre të vijë në jetë./Katror.info
Përgatiti:
