Trashëgimia e Vjosa Berishës – themelueses dhe shpirtit udhëheqës të PriFest – vazhdon të jetojë përmes festivalit që ajo e krijoi me përkushtim, vizion dhe dashuri për artin.
Sot, në përvjetorin e 17-të të PriFest, në zemër të Prishtinës, është përuruar një mural përkujtimor kushtuar artistes së ndjerë, si një homazh për jetën dhe veprën e saj të paharruar, – shkruan Katror.info.
Me ngjyra të ngrohta dhe mesazh të fuqishëm emocional, vepra simbolizon energjinë dhe pasionin që ajo i dha jetës kulturore në Kosovë.
Mundesh me e lexu edhe…
“Një prej fasadave kryesore që shihet prej pikave të ndryshme, tashmë e ka një mural të mrekullueshëm të ikonës sonë Vjosa Berishës, e cila me punën e saj ka lënë gjurmë të mëdha, gjurmë të thella. Një prej punëve, krijimeve te saj më të mëdha është PriFilm Fest që e ka fut Prishtinën në nivelin botëror të festivaleve të filmit dhe është faktikisht edhe ikonë edhe krijuese e cila ka inspiru gjenerata të tana. Është tash në zemër të Prishtinës, është vetë zemra e Prishtinës, është inspirim i qytetit tonë, vazhdon të jetojë me ne në zemrat dhe mendjet tona” – tha Kryetari i Komunës së Prishtinës, Përparim Rama.
Vepra e artistes vizuale Erëmira Murati, e njohur si Orange Girl, është vendosur në një ndër lokacionet më të frekuentuara të qytetit, ngjitur me hotelin historik “Grand”. Me punën e saj disa mujore, ajo ka arritur të pasqyrojë me ndjeshmëri shpirtin e vërtetë të Vjosës.
“Jam e lumtur që ka me qëndru tash permanent simboli i saj edhe krejt anagzhimi i saj, njëkohësisht ka me kanë inspirim tash i frekuentueshëm për krejt të rinjtë e të rejat që një gru si Vjosa me kanë inspirim për ta me vazhdu ma tutje për çdo rrugëtim që ata kanë me e ndërmarrë” – u shpreh artisja.
Të pranishëm ishin edhe familjarët e saj, të cilët ndanë kujtime dhe emocione me të pranishmit.
Fatos Berisha, bashkëshorti i saj, dhe nëna e Vjosës, Hysnie Istrefi e kujtuan atë me fjalë të ndjera, duke rikujtuar dashurinë dhe përkushtimin që ajo kishte për jetën, familjen dhe komunitetin.
“Dua të falënderoj shumë artisten Erëmirën për iniciativën në emër të familjes për këtë mural të mrekullueshëm, po ashtu kryetarin Përparim Rama, mikun e Vjosës dhe kulturës të Prishtinës, që e mundësoi me ndihmën dhe stafin e tij të gjejmë lokacionin, që murali të jetë mu afër festivalit që e ka themelu ajo” – tha Berisha.
“Vjosa ka qenë vërtetë energjike, e fjalës e punëve, tash po e shoh që vërtetë Vjosa ka qenë e paparë” – shtoi tutje znj.Istrefi.
Murali përbën një tjetër dëshmi se puna e Vjosa Berishës jo vetëm që nuk është harruar, por vazhdon të frymëzojë breza të rinj artistësh, organizatorësh dhe dashamirës të kinemasë./Katror.info.
