Shkrimtarja kosovare Vlora Konushevci do të marrë pjesë në një nga programet më prestigjioze ndërkombëtare për shkrimtarë – International Writing Program (IWP) – që zhvillohet në Universitetin e Iowa-s.
Lajmin e ka ndarë vetë Konushevci përmes një postimi në Facebook, duke theksuar se ndër vite ky program ka mirëpritur edhe laureatë të Çmimit Nobel, Pulitzer, Man Booker, si dhe fitues të shumë çmimeve të tjera të rëndësishme letrare.
“Ka lajme që i mban për vete me i shiju ma gjatë, por ka edhe lajme që duhet me i nda me të tjerët. Nga kjo fundverë e deri në fundvjeshtë do të jem pjesë e International Writing Program (IWP) në Universitetin e Iowa-s, një ndër programet më prestigjioze dhe më jetëgjata në botë për shkrimtarë. Që nga viti 1967, IWP-ja, ka mirëpritë mbi 1,600 shkrimtarë nga më shumë se 160 vende, përfshirë laureatë të Çmimit Nobel, Pulitzer, Man Booker dhe shumë çmimeve të tjera letrare. Për mua është nder, privilegj dhe përgjegjësi të jem pjesë e kësaj tradite”, ka shkruar në Facebook./Katror.info
