Titulli i 15-të evropian për Real Madridin apo i dyti për Borussia Dortmundin? Finalja e Ligës së Kampionëve të edicionit 2023/2024, Borussia Dortmund – Real Madrid, pritet të jetë e zjarrtë.
Zhvillohet të shtunën prej orës 21:00 në “Wembley”, më pak se dy javë para fillimit të Kampionatit Evropian.
Championsi ka ofruar shumë drama e shumë ndeshje të mëdha këtë edicion. Dhe e tillë pritet të jetë edhe finalja në “Wembley”. Për shkak të kaluarës së shkëlqyer në Champions dhe forcës që ka në skuadër, Real Madridi vlerësohet favorit. Por Dortmundi ka eliminuar favoritë rrugës për në finale dhe synon triumfin e madh.
Mundesh me e lexu edhe...
Real Madridi është bindshëm skuadra më e suksesshme në garën elitare kontinentale. I ka plot 14 trofe evropiane, dyfish më shumë se Milani që është i dyti në listë. Së fundi Championsin, madrilenët e kanë fituar në vitin 2022.
Dortmundi e ka një trofe në Champions, atë të vitit 1997. Në finale ishte paraqitur edhe në vitin 2013, por kishte pësuar humbje.
Real Madridi ka fituar titullin në La Liga, të 36-in në histori. Dhe tani vazhdon të forcojë rekordin në Champions. Për ikonën e Real Madridit, Toni Kroos, finalja do të jetë ndeshja e fundit në nivel klubesh.
Ai ka njoftuar për tërheqje nga futbolli i luajtur pas fundit të Euro 2024, ku do ta udhëheq Gjermaninë. Edhe për lojtarë të tjerë të Madridit mund të jetë ndeshja e fundit në këtë skuadër. Dhe mund të jetë po ashtu finalja e fundit para ardhjes së pritur të Kylian Mbappes.
Ka pasur shumë diskutime për atë se kush do të jetë në portë te Madridi. Trajneri Carlo Ancelotti të premten në konferencë për shtyp hoqi të gjitha dilemat duke e konfirmuar Thibaut Courtoisin. Ai mungoi thuajse gjatë gjithë edicionit për shkak të një lëndimi. Mes shtyllave qëndroi Andriy Lunin, që shkëlqeu. Versioni zyrtar është se Lunin ishte i sëmurë gjatë javës dhe për këtë arsye do të jetë në stol.
Ancelotti është i vetëdijshëm që skuadra e tij vlerësohet favorite e madhe. Por thotë se lojtarët e tij kanë përvojën e duhur që mos të bien në grackën e mosvlerësimit të drejtë të ndeshjes.
“Fiunalja është ndeshja më e rëndësishme, por edhe më e rrezikshmja. Duhet të shijojmë që jemi këtu dhe do ta bëjmë këtë. Por më pas është edhe brenga se ndonjë gjë mund të mos shkojë mirë”, ka thënë Ancelotti. “Ju mund të ndjeni që fitimi i Ligës së Kampionëve është shumë afër dhe po ashtu keni frikën se finalja mund të humbet. Gjëja e rëndësishme është se duhet të dimë që duhet të bëjmë çdo gjë shumë mirë, të kemi pak fat dhe të mos dorëzohemi kurrë”, ka theksuar tekniku italian.
Luka Modriq mund të jap kontribut të çmuar nëse gjërat nuk shkojnë mirë për Madridin. Ai po ashtu ka kërkuar kujdes.
“Të gjithë thonë se jemi favoritë, por nuk është kështu. E shoh si ndeshje me gjasa 50-50”, ka thënë Modriq.
Mesfushori kroat ka shtuar se Dortmundi është klub i madh që ka pasur paraqitje të mëdha në Champions.
“Gjermanët do ta bëjnë shumë të vështirë për ne. Na duhet koncentrim dhe të dëshmojmë në fushë që jemi në gjendje t’i mposhtim ata”, ka thënë Modriq.
Pas fazës grupore, Real Madridi ka mposhtur RB Leipzigun, Manchester Cityn e Bayern Muenchenin.
Rrugë shumë të vështirë kishte edhe Dortmund, që me arritje në finale ka tejkaluar të gjitha parashikimet.
PSV Eindhoveni, Atletico Madridi dhe Paris Saint-Germaini ishin skuadrat e eliminuar nga Dortmundi në rrugën për në “Wembley”.
Dortmundi nuk ka në përbërje shumë lojtarë të kalibrit që Madridi i ka me bollëk. Por lojtarët e ekipit gjerman pritet të kompensojnë këtë me përkushtim maksimal nga fillimi e deri në fund, ndërsa përkrahja për Dortmundin pritet të jetë e madhe. Dortmundi ka përfunduar i pesti në Bundesligë. Por është në finale të Championsit dhe vetëm një fitore larg trofeut. Pra edicioni për këtë skuadër mund të vlerësohet shumë i suksesshëm.
“Finalet nuk luhen, finalet fitohen. Ky është qëllimi ynë i qartë. Jemi të lumtur që jemi këtu, por duhet të fitojmë në ‘Wembley’ ndaj Real Madridit për ta pasur trofeun në dorë”, ka thënë trajneri i Dortmundit, Edin Terziq.
Terziq ka folur me shumë respekt për Ancelottin. Ka thënë se italiani është model për të tjerët e po ashtu për të.
“Përballë kemi ekipin më të suksesshëm në garë. Ne kemi pasur vetëm dy humbje këtë stinor por po ashtu e shohim që jemi gati për të garuar në nivelin më të lartë. Nëse siguroni finalen, atëherë çdo gjë është e mundur. Madridi ka rolin e favoritit, por ne nuk ishim favoritë as ndaj Atleticos e Parisit. Nëse jemi të guximshëm dhe nëse nuk luajmë për të parë Madridin duke fituar trofeun e radhës, atëherë kemi shanse”, ka shtuar Terziq.
Marco Reus, njëri prej ikonave të Dortmundit, e ka ndeshjen e fundit me skuadrën. Por për Reusin, Kroosin dhe gjithë të tjerët finalja është rast për të hyrë në histori./Katror.info
Përgatiti:
