Pas më shumë se dy dekadash që nga debutimi i saj, seria legjendare Winx Club po kthehet në ekran, këtë herë me një format të ri dhe premisa për aventura të freskëta. Netflix konfirmoi se seriali i ri, i titulluar The Magic Is Back, do të shpërthejë më 2 tetor, duke zgjuar nostalgji te fansat e vjetër dhe kuriozitet te brezi i ri.
Për ata që kanë ndjekur ngjarjet e Bloom, Stella, Flora dhe shoqeve të tyre në Shkollën e Zanave Alfea, ky rikthim është mundësia për t’u zhytur sërish në botën magjike të zanave dhe për të parë betejat e gjithmonshme të së mirës kundër së keqes. Seriali do të realizohet me CGI, duke sjellë një stil më modern, por duke ruajtur shpirtin e serisë origjinale që u transmetua për herë të parë në vitin 2004 dhe vazhdoi deri në vitin 2019.
Ky projekt vjen pas një përpjekjeje të mëparshme, jo shumë të suksesshme, për një version live-action (Fate: The Winx Saga), i cili u anulua pas dy sezoneve. Këtë herë, Netflix premton të qëndrojë më afër ADN-së së Winx Club, me histori që theksojnë miqësinë, kurajon dhe fuqinë e brendshme.
Mundesh me e lexu edhe…
Një nga surprizat e këtij seriali është një këngë e re nga Virginia Bocelli, vajza e tenorit të njohur Andrea Bocelli, e cila do të shoqërojë premierën. Pavarësisht disa polemikave të mëhershme për ndryshimet në përfaqësimin racor të personazheve, The Magic Is Back synon të rikthejë shkëlqimin që dikur bëri Winx Club një fenomen global./Katror.info
