Elon Musk ka njoftuar se kompania e tij e inteligjencës artificiale, xAI, ka blerë platformën sociale X, e njohur më parë si Twitter.
Në një postim në X të premten, Musk bëri të ditur se marrëveshja është realizuar përmes një shkëmbimi aksionesh, duke e vlerësuar xAI në 80 miliardë dollarë dhe X në 33 miliardë dollarë, shkruan BBC, transmeton Katror.info.
Kur Musk e bleu Twitter-in në vitin 2022, ai pagoi 44 miliardë dollarë për të.
Mundesh me e lexu edhe…
“E ardhmja e xAI dhe X është e lidhur ngushtë,” shkroi ai.
“Sot, hedhim hapin për të bashkuar të dhënat, modelet, kapacitetet kompjuterike, shpërndarjen dhe talentin”, tha ai.
Kjo lëvizje mund të ketë si qëllim mbrojtjen e investitorëve që ndihmuan Musk në blerjen e X nga humbjet financiare.
Të dyja kompanitë, si X ashtu edhe xAI, janë private dhe ndajnë disa investitorë të përbashkët, si dhe burime të rëndësishme.
“Kompania e re do të sjellë përvoja më të zgjuara dhe më kuptimplota për miliarda njerëz, duke qëndruar besnike ndaj misionit tonë për kërkimin e së vërtetës dhe avancimin e njohurive,” tha Musk.
xAI ka përdorur të dhëna nga postimet në X për të trajnuar modelet e saj të inteligjencës artificiale, ndërsa chatbot-i i saj, Grok, është një nga funksionet kryesore të platformës.
Sipas analistit Paolo Pescatore, themelues i PP Foresight, ky hap është i natyrshëm, duke pasur parasysh rritjen e investimeve në inteligjencën artificiale, qendrat e të dhënave dhe fuqinë kompjuterike.
Ndërkohë, Musk është përfshirë në një betejë ligjore me OpenAI, kompaninë që ai e bashkëthemeloi në vitin 2015 me CEO-n Sam Altman.
Vitit e kaluar, ai e paditi OpenAI-n dhe Altman-in, duke i akuzuar se janë larguar nga misioni fillestar i kompanisë dhe po e kthejnë atë në një biznes fitimprurës.
Sipas Wall Street Journal, OpenAI është në bisedime për të siguruar një investim prej 40 miliardë dollarësh nga konglomerati japonez SoftBank, me kusht që të përfundojë tranzicioni i saj në një kompani me qëllime fitimi.
OpenAI nuk iu përgjigj kërkesës së BBC-së për koment mbi këtë zhvillim.
Kritikët besojnë se Musk po e padit OpenAI-n sepse dëshiron të ketë kontroll mbi të.
Më herët këtë vit, ai udhëhoqi një grup investitorësh që ofruan 97.4 miliardë dollarë për të blerë OpenAI-n, por Altman e refuzoi ofertën, duke deklaruar se kompania nuk është në shitje.
Këto lëvizje në fushën e biznesit po ndodhin në një kohë kur Musk është gjithnjë e më i angazhuar në politikë. Aktualisht, ai është një nga mbështetësit kryesorë të Presidentit Donald Trump.
Ai ka udhëhequr përpjekjet e administratës për të reduktuar shpenzimet federale dhe këtë fundjavë ndodhet në Wisconsin, ku ka investuar miliona dollarë në një garë për Gjykatën e Lartë të shtetit.
Ndërkohë, Prokurori i Përgjithshëm i Wisconsin-it ka kërkuar nga një gjykatë të premten që të ndalojë Musk nga shpërndarja nga dhënia e çekëve prej 1 milion dollarësh për votuesit në prag të zgjedhjeve. /Katror.info
Përgatiti:
