Më 10 dhjetor 2024, Prishtina do të bëhet epiqendra e muzikës operistike me një gala koncert të jashtëzakonshëm. Në Sallën e Kuqe të Pallatit të Rinisë, publiku do të ketë mundësinë të shijojë një gala koncert, ku do të ngjiten në skenë tre yje të njohur ndërkombëtarë: tenori i shquar Saimir Pirgu, sopranoja me famë botërore Marigona Qerkezi, dhe dirigjentja e talentuar Elda Laro.
Saimir Pirgu: Një tenor i klasit botëror
Tenori i famshëm ndërkombëtar, Saimir Pirgu, është një nga artistët më të njohur në skenat e mëdha të operës. I vlerësuar nga New York Times si “një tenor me zë të ëmbël dhe energjik,” Pirgu ka fituar duartrokitje në shtëpitë më të mëdha të operës në botë, duke përfshirë Metropolitan Opera në New York, Teatro alla Scala në Milano, Vienna Staatsoper, London Royal Opera House dhe Sydney Opera House.
Me një prani skenike të fuqishme dhe një zë të veçantë, ai ka debutuar në role ikonike si Cavaradossi në Tosca, Don José në Carmen, Hoffmann në Les Contes d’Hoffmann, Pinkerton në Madama Butterfly dhe Faust në Sydney Opera House. Përkushtimi dhe pasioni i tij i pakrahasueshëm kanë frymëzuar audienca në mbarë botën, duke e vendosur atë si një nga emrat më të rëndësishëm në botën e operës.
Marigona Qerkezi rikthehet në Kosovë
Pas shumë vitesh mungese, Marigona Qerkezi rikthehet për të performuar në vendlindje.
“Të dashur miq, shpesh më pyesni se kur do të rikthehem të performoj në Kosovë. Jam shumë e lumtur të ju ftoj në koncertin tonë më 10 Dhjetor 2024 në Prishtinë, ku rikthehem pas shumë vitesh, kësaj radhe për të performuar për herë të parë me Operën e Kosovës krahas tenorit fantastik Saimir Pirgu dhe dirigjentes së shkëlqyer Elda Laro,” shkroi ajo në një postim në rrjetet sociale.
Marigona është e njohur si një nga sopranot më të shquara shqiptare në skenat operistike ndërkombëtare. Karriera e saj përfshin performanca në teatro të mëdhenj si Teatro La Fenice (Venecia), Gran Teatre del Liceu (Barcelonë), Dubai Opera House dhe Deutsche Oper am Rhein (Düsseldorf). Me një repertor të pasur që përfshin role si Anna Bolena, Norma dhe Aida, ajo ka fituar duartrokitjet e publikut në mbarë botën.
Elda Laro: Një dirigjente e shquar me karrierë ndërkombëtare
Elda Laro, një nga artistet më të talentuara të brezit të saj, është aktualisht pianiste, trajnere dhe dirigjente në Deutsche Oper në Berlin. Ajo ka performuar me emrat më të mëdhenj të muzikës klasike në mbarë botën. Karriera e saj filloi si një fëmijë i talentuar, kur në moshën 11-vjeçare interpretoi koncertin e parë për piano të Beethoven-it me Orkestrën Kombëtare të Shqipërisë.
Përvoja dhe aftësitë e saj të shumanshme e bëjnë Eldën një emër të rëndësishëm në botën e muzikës klasike.
Opera e Kosovës e ka përshkruar këtë ngjarje si një mbrëmje të paharrueshme: “Mos e humbisni këtë gala koncert të jashtëzakonshëm.” Ky koncert përfaqëson jo vetëm një moment kulmor për skenën artistike të Kosovës, por edhe një mundësi për publikun të përjetojë mjeshtërinë e artistëve të shquar të skenës ndërkombëtare.”/Katror.info
Përgatiti:
