Me një ceremoni madhështore në Teatrin “Faruk Begolli” të Kolegjit AAB, festivali ndërkombëtar i teatrit Prishtina International Theater Festival (PITF), ka hapur të hënën edicionin e tij të nëntë.
PITF, i organizuar nga Kolegji AAB, këtë vit sjell trupa teatrore nga e gjithë bota, duke kthyer qytetin në një qendër të artit ndërkombëtar.
Në natën e parë, pas fjalimeve të mirëseardhjes dhe hapjes zyrtare, festivali nisi me shfaqjen “On the heart of the rose” nga Franca.
Mundesh me e lexu edhe…
Në rolin kryesor shkëlqeu Aphrodite De Lorraine — aktorja me prejardhje shqiptare e rritur në Francë, e cila u prit me duartrokitje të gjata nga publiku.
Ceremonia e hapjes mblodhi figura të njohura nga fusha e artit, kulturës dhe diplomacisë, të cilët ndanë entuziazmin për një javë të mbushur me teatër ndërkombëtar në zemër të Prishtinës.
Në fjalimin përurues, theksi u vu mbi rëndësinë e teatrit si një formë unike komunikimi që bashkon njerëzit përtej kufijve, ndërsa festivali u cilësua si një platformë e fuqishme për shkëmbim kulturor dhe frymëzim artistik.
Festivali vazhdoi të martën me shfaqjen greke “Petrichora – The story of bridge of Arta”, që u prezantua në Teatrin Kamertal të AAB nga ora 20:00.
Prishtina është përfshirë nga energjia e teatrit ndërkombëtar – dhe ky është vetëm fillimi. Programi i plotë i festivalit.⬇️/Katror.info
