Bagazhet artistike të katër grupeve të ndryshme të zhanrit jazz e karakterizuan ditën e dytë “Mitrovica Internacional Jazz Days”.
Interpretues nga Ukraina, Gjermania, Italia, Austria, Zvicra, Shqipëria e Mbretëria e Bashkuar i dhanë ngjyra Mitrovicës të martën mbrëma.
Mbrëmja nisi me këngët qindravjeçare ukrainase të sjella nga ansambli “Ganna”. Pastaj programi vazhdoi me kuartetin eksperimental nga Italia, si dhe me pika sentimentale nga duo Karen Astarian dhe Andrej Prozorow.
Mundesh me e lexu edhe…
Grupi i fundit që u ngjit në skenën ishte Elina Duni e Rob Luft, bashkë me Viktor Filipovski e Kiril Tufekcievski. Një program me këngë shqipe të vjetra e të ri-punuara në një jazz të veçantë ishte ajo që u këndua Duni, duke argëtuar publikun mitrovicas.
“Është një kënaqësi shumë e madhe. Qysh në momentin e parë që Rona më kontaktoi i thashë se do të vij me shumë dëshirë. Kisha 20 vjet pa ardhur në Mitrovicë dhe m’u duk shumë e rëndësishme të isha pjesë e këtij edicioni, për muzikën dhe kulturën. Është edhe një akt shoqëror që të ndodhë ky festival në Mitrovicë”, tha Duni.
Ajo bashkë me grupin performues sollën këngë të ndryshme shqipe me traditë shumëvjeçare. “As e vogël, as e madhe”, “O vendi im”, “Mora testin”, Hape derën” ishin vetëm disa nga perlat shqipe që Duni i solli në skenën e Mitrovicës, në stilin e saj të veçantë të jazz-it.
Rona Nishliu, organizatore e Festivalit, ka thënë se është e kënaqur me rezultatin e punës së vazhdueshme që ata kanë bërë për ta sjellë në Mitrovicë edicionin e parë.
“E rëndësishme është që kanë ardhur. Ka qenë pak e vështirë, por s’ka rëndësi. Ne arritëm që t’i sjellim me ndihmën e bashkëpunëtorëve dhe atyre që na besuan. Ishin shtysa dhe shtylla kryesore e krejt kësaj që e kemi parë për dy ditë dhe do ta shohim edhe në vijim në koncertin përmbyllës”, ka thënë Nishliu.
“Mitrovica International Jazz Days” nisi edicionin e parë të tij këtë të hënë, përderisa përfundon të shtunën, më datë 2 shtator. Richard Bona dhe “Big Band” bëri hapjen e këtij festivali, përderisa në mbyllje do të performojnë tri grupe të ndryshme. Miachel League dhe Bill Laurance do ta bëjnë hapjen e koncertit të 2 gushtit, për të vazhduar me Daphna Levy dhe Tamir Miler, e për t’u përmbyllur me “UP Youth Jazz Ensemble” nga Kosova./Katror.info
Përgatiti:
