Presidentja e Republikës së Kosovës, Vjosa Osmani, priti sot në takim shefen e Misionit për Vëzhgimin e Zgjedhjeve nga Bashkimi Evropian (EU EOM), eurodeputeten Nathalie Loiseau, e cila i dorëzoi raportin përfundimtar të këtij misioni lidhur me zgjedhjet parlamentare të mbajtura në vitin 2025, shkruan Katror.info.
Gjatë takimit, Presidentja Osmani falënderoi eurodeputeten Loiseau dhe gjithë anëtarët e misionit për angazhimin dhe profesionalizmin e treguar gjatë gjithë procesit zgjedhor. Ajo theksoi se prezenca e këtij misioni, e cila u mundësua me kërkesë të saj, dëshmon përkushtimin e institucioneve të Kosovës ndaj transparencës, llogaridhënies dhe sundimit të ligjit, duke theksuar gjithashtu përmbushjen e standardeve më të larta demokratike.
Presidentja vlerësoi se zgjedhjet e sivjetme ishin një dëshmi e pjekurisë politike dhe qytetare në vend, duke nënvizuar se procesi u zhvillua në mënyrë të qetë dhe të rregullt, si tregues i funksionimit të një demokracie të gjallë dhe në përparim të qëndrueshëm.
Mundesh me e lexu edhe…
Nga ana e saj, shefja e misionit vëzhgues, Nathalie Loiseau, përgëzoi Presidenten Osmani për angazhimin në ruajtjen e vlerave demokratike dhe për organizimin paqësor të zgjedhjeve.
“Gjatë takimit, Shefja e Misionit Vëzhgues, Loiseau, prezantoi shkurtimisht gjetjet kryesore nga raporti përfundimtar i EU EOM dhe dha një përmbledhje të vëzhgimeve të misionit gjatë gjithë procesit zgjedhor”, thuhet në njoftim.
Në takim u diskutua edhe për rekomandimet e raportit përfundimtar të EU EOM, të cilat synojnë përmirësimin e mëtejmë të transparencës dhe efektivitetit të proceseve zgjedhore në Kosovë. Raporti do të prezantohet zyrtarisht nesër në një konferencë për media në ora 13:00 (CEST).
/Katror.info
