Ish-basketbollistja e njohur, Elvira Dushku, pritet të nisë “epokë” të re për sportin kosovar – angazhimin e zyrtarëve nga Kosova në organizatat ndërkombëtare sportive.
Dushku ka shumë vjet që e kryen detyrën e sekretares së përgjithshme në Federatën e Basketbollit të Kosovës. Për punën që e kryen vlerësohet lartë në FBK, në komunitetin e basketbollit kosovar, por edhe të sportit kosovar në përgjithësi. Krahas detyrave si sekretare gjenerale, Dushku ka vazhduar shkollimin për menaxhment sportiv.
Së fundmi, ish-basketbollistja e Universitetit të Prishtinës, ka përfunduar me sukses programin MESGO, përkatësisht Masterin Ekzekutiv në Qeverisjen Globale në Sport. Ky është një program unik i krijuar për profesionistët e sektorit të sportit, që dëshirojnë të zotërojnë dimensionet komplekse dhe diversitetin e praktikave ndërkombëtare që lidhen me sportin profesional në nivel ndërkombëtar.
Mundesh me e lexu edhe…
Dushku e ka diplomimin në këtë program në fillim të tetorit dhe më pas pritet ta nisë punën në Federatën Ndërkombëtare të Basketbollit (FIBA), që selinë e ka në Gjenevë të Zvicrës.
“Kjo do të bëhet në koordinim me Federatën e Basketbollit të Kosovës, pjesë e së cilës organizatë jam dhe do të vazhdoj të jem”, ka thënë Dushku të martën për KOHËN.
“Ideja është që të punoj në FIBA si menaxhere për federatat nacionale. Pra që të punoj me federata. Mund të them që është një pozitë e mesme. E njoh mirë punën e federatave dhe besoj se jam gati për këtë sfidë. Por kjo vjen në konsideratë vetëm pasi të diplomoi në Masterin që jam duke ndjekur, e të cilin do ta përfundojë në fillim të tetorit, kur edhe do të mbahet ceremonia e diplomimit”, ka shtuar Dushku.
Deri më tani, asnjë zyrtar nga federatat sportive kosovare nuk është punësuar në federatat evropiane apo ndërkombëtare. Për këtë arsye, Dushku do të fillojë epokë të re./koha
Përgatiti:
