Kjo është struktura e re e çmimeve të rrymës pas vendimit të ZRrE-së

Secila prej katër tarifave të energjisë elektrike për konsumatorët është shtrenjtuar, sipas listës që ka siguruar KOHA nga mbledhja e Zyrës së Rregullatorit për Energji.

Tarifa e ditës për ata që shpenzojnë më pak se blloktarifa prej 800 kilovatë në muaj, nga 7.79 centë ka mbërritur në 9.05 centë për kilovat.

Tarifa e natës për ata që shpenzojnë më pak se blloktarifa prej 800 kilovatë në muaj nga 3.34 centë ka mbërritur në 3.88 centë për kilovat.

Për kilovatët e shpenzuar mbi blloktarifën prej 800 kilovatësh, çmimi për tarifën e ditës ka shkuar nga 13.29 centë në 15.43 centë, ndërsa ajo e natës nga 6.27 centë në 7.28.

***

Zyra e Rregullatorit për Energji (ZRRE) ka miratuar sot tarifat e reja të energjisë elektrike, të cilat do të hyjnë në fuqi nga 1 maji. Sipas vendimit të miratuar me pesë vota për dhe asnjë kundër, tarifat do të rriten mesatarisht për 16.1 për qind në krahasim me çmimet aktuale, shkruan Katror.info.

Në mbledhjen e radhës të mbajtur nga ZRRE, u shqyrtuan dhe u miratuan tarifat për Shfrytëzimin e Rrjetit të Transmetimit dhe Tregut (KOSTT), tarifat për Shfrytëzimin e Rrjetit të Shpërndarjes (KEDS), si dhe tarifat për Furnizuesin me Shërbim Universal (KESCO).

Vendimi vjen pas vlerësimit të të Hyrave të Lejuara Maksimale për të gjitha kategoritë e konsumatorëve. ZRRE ka bërë të ditur se ky vendim është pjesë e rregullimit të radhës dhe i nevojshëm për të siguruar funksionim të qëndrueshëm të sistemit energjetik në vend.

Megjithatë, rritja e tarifave është shoqëruar me kritika. Përfaqësues të ZRRE-së nuk kanë marrë në konsideratë komentet e konsumatorëve dhe as të Presidencës, të cilat ishin dorëzuar gjatë periudhës së konsultimeve publike. Ky është rritja e tretë e tarifave gjatë katër viteve të fundit, e cila po ashtu është arsyetuar nga rregullatori si domosdoshmëri për të përballuar kostot në rritje të sektorit./Katror.info