Zyra e Rregullatorit për Energji (ZRRE) ka bërë të ditur se ka siguruar mbështetje teknike nga Banka Evropiane për Rindërtim dhe Zhvillim (BERZH), për të zhvilluar një mekanizëm të avancuar mbështetës për Burimet e Ripërtëritshme të Energjisë (BRE), shkruan Katror.info.
Sipas njoftimit zyrtar, kjo mbështetje është pjesë e angazhimeve të vazhdueshme të ZRRE-së për të përmirësuar kuadrin rregullativ dhe për të nxitur investime në teknologji të qëndrueshme dhe miqësore me mjedisin.
“Bashkëpunimi i ngushtë me BERZH-in përfaqëson një hap të rëndësishëm drejt forcimit të kapaciteteve institucionale dhe rritjes së transparencës në proceset rregullative”, thuhet në komunikatën e ZRRE-së.
Mundesh me e lexu edhe...
Ky mekanizëm i ri pritet të krijojë kushte më të favorshme për zhvillimin e tregut të energjisë nga burimet e ripërtëritshme, duke qenë në përputhje me objektivat strategjike të vendit dhe standardet evropiane për tranzicionin e gjelbër.
ZRRE thekson se mbetet e përkushtuar që përmes këtij bashkëpunimi dhe përfshirjes aktive të të gjitha palëve të interesit, të sigurojë një qasje të drejtë, gjithëpërfshirëse dhe të qëndrueshme në zhvillimin e sektorit energjetik në Kosovë./Katror.info
