Në një deklaratë të bërë gjatë prezantimit të fitimeve tremujore të Meta, shefi ekzekutiv i kompanisë, Mark Zuckerberg, tha se në të ardhmen, njerëzit që nuk do të përdorin syze inteligjente me inteligjencë artificiale (AI) do të ndodhen në një “disavantazh të konsiderueshëm kognitiv” krahasuar me ata që i përdorin.
Këto komente vijnë në një kohë kur Meta ka ngritur një laborator të posaçëm për “superinteligjencën” artificiale, duke punësuar studiues të paguar shumë për të përparuar në fushën e AI-së. Në tremujorin e dytë të vitit 2025, Meta tejkaloi pritshmëritë e analistëve me të ardhura prej 47.5 miliardë dollarësh dhe një rritje prej 36% të fitimit vjetor, duke arritur 18.3 miliardë dollarë, shkruan Fortune, përcjell Katror.info.
Zuckerberg, gjithmonë një përkrahës i hershëm i teknologjive të reja, deklaroi se syzet inteligjente, si Meta Ray-Ban prej 299 dollarësh, do të bëhen një domosdoshmëri në të ardhmen, ashtu siç janë sot syzet optike për ata me probleme shikimi.
Mundesh me e lexu edhe…
“Nëse në të ardhmen nuk ke syze që përmbajnë AI ose ndonjë mënyrë për të bashkëvepruar me AI, do të jesh, me shumë mundësi, në një disavantazh kognitiv krahasuar me të tjerët, qoftë në punë apo në garë me ta,” tha Zuckerberg.
Meta ka përkushtuar një ekip të përzgjedhur studiuesish, të udhëhequr nga talenti i njohur në AI Alexandr Wang, për të zhvilluar më tej këtë teknologji që integron AI në mënyrë të plotë në përditshmëri.
Zuckerberg tha gjithashtu se syzet Meta po shihen gjithnjë e më shumë jo vetëm si pajisje teknologjike, por edhe si aksesorë të stilit, çka ka ndikuar pozitivisht në shitjet. Sipas raportit të fundit nga prodhuesi EssilorLuxottica, të ardhurat nga syzet Meta Ray-Ban janë trefishuar krahasuar me vitin e kaluar.
Syzet inteligjente të Meta përdorin një version gjithnjë e më të avancuar të Meta AI, ndërsa në të ardhmen pritet të pajisen edhe me ekran vizual, duke lejuar ndërveprim të përhershëm me AI në një mënyrë të integruar dhe multimodale.
“Kjo do të sjellë një vlerë të madhe, pasi AI mund të shohë përmbajtjen përreth teje, të krijojë një ndërfaqe vizuale, të tregojë informacion dhe të ndihmojë në kohë reale,” shpjegoi Zuckerberg.
Ai theksoi se kjo përvojë e plotë teknologjike është gjithashtu një hap drejt realizimit të vizionit të metaversit, i cili sipas tij do të jetë një pjesë thelbësore e së ardhmes, me AI që do ta përshpejtojë ndjeshëm.
“Syzet janë mënyra ideale për të ndërthurur botën fizike me atë digjitale. Vizioni i metaversit do të bëhet shumë i rëndësishëm dhe AI do ta përshpejtojë atë,” shtoi ai.
Pas lançimit të syzeve të para Meta Ray-Ban në vitin 2021, kompania ka zgjeruar linjën duke përfshirë edhe markën Oakley, për një koleksion të dedikuar për sportistë, ndërsa pritet që Meta të prezantojë syzet e para të realitetit të shtuar (AR) deri në vitin 2027, sipas burimeve të “The Verge”./Katror.info
