Përfaqësuesja e Kosovës në futboll për femra ka zhvilluar një seancë stërvitore në Kampin Nacional në Hajvali, si përgatitje për dy ndeshjet miqësore që do t’i zhvillojë në Estoni, më 28 qershor dhe 1 korrik.
Këto përballje janë pjesë e një faze testuese në kuadër të përgatitjeve për ndeshjet vendimtare të “play-off”-it të Ligës së Kombeve kundër Turqisë, që zhvillohen në tetor, shkruan Katror.info.
Përzgjedhësi i Kosovës, Sami Sermaxhaj, tha se megjithëse datat e ndeshjeve nuk janë të favorshme për shkak të mbylljes së kampionatit vendas, grumbullimi mbetet i rëndësishëm për testimin e lojtareve të reja dhe ndërtimin e skuadrës për sfidat që vijnë. Megjithatë, trajneri është optimist se skuadra do ta përfaqësojë denjësisht vendin me lojtaret në dispozicion.
Mundesh me e lexu edhe…
Sulmuesja Kaltrina Biqkaj vlerësoi grumbullimin si mundësi të mirë për të testuar formën dhe për të ndërtuar kohezion në ekip përpara ndeshjeve ndaj Turqisë.
“Janë dy ndeshje testuese, të cilat besoj se do të na shërbejnë shumë mirë, sidomos për ta parë gjendjen e ekipit, por edhe si paralojë për ndeshjet e ‘play-off’-it kundër Turqisë,” – tha Biqkaj, duke shtuar se përballjet e mëparshme me Estoninë kanë qenë të suksesshme, njofton FFK.
Emocione të veçanta ndau edhe futbollistja e re Krenare Kelmendi, e ftuar për herë të parë në Kombëtaren A. Edhe pse për shkak të angazhimeve shkollore nuk do të udhëtojë në Estoni, ajo e cilëson ftesën si një vlerësim të madh për të ardhmen.
“Është hera e parë që jam pjesë e Kombëtares A dhe po ndihem shumë mirë dhe e vlerësuar… shpresoj se në të ardhmen sërish do të jem e ftuar,” – deklaroi Kelmendi.
Skuadra udhëton sot drejt kryeqytetit estonez, Talin, ku do t’i bashkohen edhe lojtaret që luajnë jashtë vendit. Para ndeshjes së parë të planifikuar për të shtunën, Kosova do të zhvillojë edhe një seancë stërvitore.
Këto dy miqësore pritet të ndihmojnë trajnerin dhe stafin teknik të përcaktojnë potencialin e lojtareve të reja për përballjet vendimtare në vjeshtë, në rrugëtimin për një sukses të ri në arenën ndërkombëtare./Katror.info
