Sot hapet zyrtarisht CrossRoads Festival 2025, një ngjarje unike që për herë të parë e shndërron Hanin e Elezit në një pikë ndërkombëtare takimi për art, kulturë dhe aventurë.
Nën moton “The Paths We Walk Together”, festivali do të zgjasë tri ditë, nga 18 deri më 20 korrik, duke ofruar një program të pasur dhe gjithëpërfshirës për të gjitha moshat, raporton Katror.info.
Një hapje e fuqishme me art e muzikë
Dita e parë e festivalit nis që në orët e para me punëtori teatrore dhe performanca për të rinj, të udhëhequra nga artistë vendas dhe ndërkombëtarë si Meli Qena, Brianda Carreras (Itali) dhe Fatbardh Kabashi.
Mundesh me e lexu edhe...
Në mbrëmje, festivali do të hapet zyrtarisht në ora 20:30 me një ceremoni pranë memorialit historik “Bllaca 99”, ndjekur nga koncerte të Siparantum Choir, Florian Çanga, dhe Shpend Hysaj & Band – duke vendosur tonin emocional dhe artistik për ditët në vazhdim.
Dita e dytë: Kujtesë, natyrë dhe ekspozita
E shtuna fillon me “Hiking i Kujtesës”, një ecje simbolike që përshkon malet përreth Hanit të Elezit, duke reflektuar mbi kujtesën kolektive dhe historinë e rajonit. Aktivitetet gjatë ditës përfshijnë punëtori mjedisore dhe interaktive, si “Green Path” nga Bedri Bushi dhe Agron Qajani.
Mbrëmja e dytë do të ndriçohet nga ekspozita artistike “EX 99” dhe instalacione drite, ndërsa skena kryesore do të mirëpresë performanca nga Alzan Gashi, Edona Reshitaj dhe përsëri Florian Çanga.
Dita e tretë: Reflektim, poezi dhe përmbyllje emocionale
Të dielën, festivali hyn në një fazë më reflektuese me tryezën shkencore “Udhëkryq i Kujtesës”, dedikuar historisë dhe identitetit lokal. Po ashtu, fëmijët dhe të rinjtë do të kenë mundësi të angazhohen në aktivitete krijuese dhe argëtuese.
Në mbrëmje, poetja Ilire Zajmi do të udhëheqë një mbrëmje poetike, ndërsa instalacionet e Florian Çangës do të përshëndesin natën për herë të fundit. Festivali do të mbyllet me një koncert nga Nezafete Shala & Melodia e Vjetër, duke sjellë tinguj tradicionalë dhe emocione të forta për të gjithë pjesëmarrësit.
Han i Elezit, zemra e një festivali të ri
Zgjedhja e Hanit të Elezit si lokacion për CrossRoadsFest nuk është rastësore. Ky qytet kufitar, i njohur historikisht si një udhëkryq kulturash dhe rrugësh, tani merr një dimension të ri si qendër e bashkëjetesës kulturore përmes artit.
Me një program që përfshin muzikë, teatër, ekspozita, ecje në natyrë dhe diskutime, CrossRoadsFest 2025 premton të jetë një prej ngjarjeve më domethënëse të verës në Kosovë.
Ndiqni festivalin me Katror Media
Katror Media, si partner medial zyrtar, do të sjellë tek publiku transmetime të drejtpërdrejta, podcaste, kronika video dhe artikuj në kohë reale, për të ndarë magjinë e këtij festivali me ata që nuk mund të jenë fizikisht aty.
