Në përmbyllje të pjesëmarrjes së tij në Konferencën Ndërkombëtare mbi pagesat dhe infrastrukturat e tregut me temën “Rikrijimi i Pagesave për Epokën Digjitale”, të organizuar në Ohër nga Banka Kombëtare e Republikës së Maqedonisë së Veriut dhe Banka Qendrore e Holandës (De Nederlandsche Bank), Guvernatori i Bankës Qendrore të Republikës së Kosovës (BQK), Ahmet Ismaili, theksoi se integrimi në SEPA përbën një hap strategjik drejt integrimit të plotë evropian të vendit.
Në fjalën e tij para pjesëmarrësve, Guvernatori Ismaili nënvizoi angazhimin e BQK-së për modernizimin e sistemit të pagesave, forcimin e infrastrukturës financiare dhe përgatitjen për integrim në Zonën e Vetme të Pagesave në Euro (SEPA), si pjesë e afrimit me standardet e Bashkimit Evropian. Ai tha se Kosova ka kaluar nga reformat graduale në një transformim gjithëpërfshirës të ekosistemit të pagesave, të përafruar me praktikat më të mira evropiane.
Duke folur për aspektet teknike, Guvernatori Ismaili theksoi se bankat dhe institucionet financiare në Kosovë tashmë zbatojnë formatin IBAN dhe standardin ISO 20022, ndërsa tregu po hapet për akterë të rinj FinTech që sjellin konkurrencë dhe inovacion.
Mundesh me e lexu edhe...
Ai po ashtu përmendi sfidat që mbeten, përfshirë sigurimin e përputhjes së plotë me direktivat PSD2 dhe PSD3, forcimin e kapaciteteve mbikëqyrëse në fushën e parandalimit të pastrimit të parave dhe financimit të terrorizmit, si dhe nevojën për sinkronizim teknik dhe operacional me standardet evropiane.
Guvernatori bëri të ditur se BQK ka integruar procesin e SEPA-s në një strategji më të gjerë të transformimit të pagesave, që përfshin modernizimin e infrastrukturës, bankingun e hapur, pagesat e menjëhershme dhe gjithpërfshirjen financiare. Në këtë drejtim, projekti TIPS Clone do të mundësojë pagesa të shpejta kombëtare dhe ndërkufitare.
Në panelin e nivelit të lartë “Realizimi i SEPA-s para anëtarësimit në BE: Përafrimi i infrastrukturës, rregulloreve dhe inovacionit”, me pjesëmarrjen e guvernatorëve të rajonit dhe përfaqësuesve të Bankës Botërore, Guvernatori Ismaili falënderoi organizatorët dhe partnerët ndërkombëtarë për mundësinë e shkëmbimit të përvojave dhe përkrahjen në modernizimin e sistemit të pagesave të Kosovës. /RTK/Katror.info
