Ronaldo Nazario e rendit veten së bashku me lojtarë si Lionel Messi dhe Diego Maradona si pjesë e një “grupi shumë të veçantë” të lojtarëve më të mëdhenj të futbollit.
Sulmuesi legjendar Ronaldo e udhëhoqi Brazilin drejt triumfit më të fundit të Kupës së Botës 20 vjet më parë, duke shënuar tetë gola në Kampionatin Botëror, i cili atëbotë u zhvillua në Japoni dhe Kore të Veriut, ndërsa skuadra e cila atëbotë udhëhiqej nga treneri Luiz Felipe Scolari, u kurorëzua për herë të pestë Kampion i botës.
Ndërsa Ronaldo beson se bëmat e tij e vendosën atë në panteonin e të mëdhenjve të futbollit, ai tha për Guardian se ishte e vështirë të krahasoheshin aftësitë e tij me ato të lojtarëve nga gjenerata të ndryshme, shkruan Keep Up.
Mundesh me e lexu edhe...
I pyetur për të zgjedhur se cili është futbollist më i mirë mes shtatë herë fituesit të Topit të Artë, Leo Messi dhe një tjetër ikonë të Argjentinës, Diego Armando Maradonës, Ronaldo tha: “Kjo është e padrejtë! Mendoj se ekziston një grup shumë shumë i veçantë i futbollistëve, ku keni Diegon, Messin, [Johan] Cruyffin, [Franz] Beckenbauerin, Pelen, [Marco] Van Bastenin, Ronaldinhon. Në këtë grup do të përfshija edhe veten”.
“Le ta thonë tifozët, le ta debatojnë nëpër lokale, por nuk mund t’i renditësh, nuk mund të krahasosh brezat. Njerëzit më quajnë Ronaldo ‘origjinal’, por kishte të tjerë – as ata nuk ishin fals. Unë nuk jam i vetmi, dhe më shumë do të vijnë dhe do të jenë më të mirë se unë në gjithçka. Unë bëra atë që munda, më të mirën që munda”, theksoi Ronaldo.
Shpresat e Brazilit për të përsëritur fitoren e Kupës së Botës 2002 në Kampionatin Botëror i cili duke filluar nga nëntori do të zhvillohet në Katar, do të varen kryesisht nga forma e Neymar, i cili ka qenë i përfshirë në 42 për qind të golave të Selecaos në Kupën e Botës që nga debutimi i tij në turne në vitin 2014 (ka qenë i përfshirë në 8 nga 19 golat e shënuara nga Brazili – gjashtë gola, dy asistime) .
Ronaldo krahasoi aftësitë e sulmuesit të Paris Saint-Germain me ato të Messit dhe Cristiano Ronaldos, duke këmbëngulur se asnjë tifoz futbolli nuk mund të mos kënaqet duke e shikuar atë duke luajtur.
“Njerëzit e duan shumë atë”, shtoi Ronaldo për Neymar. “Nëse flasim konkretisht për futbollin, dyshoj se ka ndonjë që nuk e do. Jeta e tij private e kapërcen futbollin, por mua nuk më intereson.
“Ai është i guximshëm, ka aftësi, shumëllojshmëri, është i shpejtë, shënon gola, ka personalitet. Mund ta krahasoni me Messin dhe Cristiano Ronaldon, edhe pse ata janë nga një planet tjetër.
“Në fushë Neymar është një [gjë], por pastaj njerëzit përzihen në të gjitha gjërat e tjera”, thotë Ronaldo Nazario./Katror.info
Përgatiti:
