Kur vendosni të filloni një rutinë të rregullt ushtrimesh, një nga dilemat e para është nëse duhet të investoni në veshje të shtrenjta sportive.
Ndërsa veshjet e specializuara mund të ofrojnë përfitime në performancë dhe rehati, ekspertët thonë se ato nuk janë të domosdoshme. Për shumicën e njerëzve, përzgjedhja e rrobave të duhura lidhet më shumë me komoditetin dhe përshtatshmërinë sesa me çmimin e tyre.
Ky artikull shkruar nga CNN, shqyrton rëndësinë e veshjeve të duhura për stërvitje, duke përfshirë faktorët që ndikojnë në zgjedhjen e materialeve, këpucëve dhe aksesorëve për aktivitete të ndryshme fizike.
Mundesh me e lexu edhe...
“Nëse ushtroni thjesht për qejf ose për të qenë më aktiv, nuk është gjëja më e rëndësishme të dilni e të blini rroba specifike,” thotë Dr. Joel Hardwick, fiziolog klinik i ushtrimeve në Universitetin e Illinois në Çikago.
“Duhet vetëm të siguroheni që veshja juaj të përmbushë kriteret minimale të mos jetë shumë e ngushtë, as shumë e lirshme, dhe të ndihet rehat”, shton ai.
Komoditeti është kyç
Kaylee Johnson, trajnere kryesore e performancës në aplikacionin e fitnesit Future, pajtohet se komoditeti është kryesor.
“Nëse blerja e veshjeve specifike do të ishte një pengesë për të shkuar në palestër, thjesht vishni çfarëdo që ju duket e rehatshme,” thotë ajo. “Nuk duhet të jetë perfekte”, thotë ajo.
Megjithatë, është e rëndësishme të jeni të kujdesshëm në zgjedhjen e rrobave, sidomos nëse do të ushtroni jashtë.
“Është më me rëndësi të mendoni për rrobat në raport me klimën dhe kushtet e motit, si p.sh. shiu,” thotë Hardwick.
Rrobat e përshtatshme për mot të nxehtë dhe të ftohtë
Në përgjithësi, shmangni veshjet prej pambuku nëse do të jeni jashtë. Kur djersiteni, rrobat e pambukut thithin lagështinë dhe e mbajnë kundër lëkurës tuaj, gjë që mund të shkaktojë mbinxehje në temperatura të larta dhe rrezik për hipotermi apo ngrirje në temperatura të ulëta, sipas Shoqatës Ndërkombëtare të Shkencave të Sportit.
Në mot të ftohtë, shtresat janë thelbësore, thotë Johnson. Mund t’i hiqni kur ngroheni dhe t’i vishni përsëri kur ftoheni.
Zgjedhja e këpucëve të duhura për ushtrime
Këpucët janë gjithashtu një faktor i rëndësishëm, qoftë për ushtrime në ambiente të mbyllura apo të hapura. Idealja do të ishte të zgjidhni këpucë të dizajnuara për aktivitetin që bëni (vrapim, basketboll, tenis, etj.), por edhe një palë këpucë sportive të përgjithshme mund të funksionojnë.
“Për sa kohë që këpucët janë të rehatshme, jo shumë të përdorura, jo shumë të ngushta ose të lira dhe lejojnë hapësirë për lëvizjen e gishtave, atëherë zakonisht janë në rregull,” thotë Hardwick.
Mbështetja e duhur është thelbësore, shton Johnson, megjithatë ka përjashtime, veçanërisht në stërvitjet e forcës.
“Veshja e këpucëve të vrapit për të bërë stërvitje force nuk është e mirë, sepse ato kanë shumë amortizim,” thotë Johnson. “Për stabilitet, ju duhen këpucë me shollë të sheshtë”, shpjegon ai tutje.
Nëse vendosni të vraponi, megjithatë, duhet të zgjidhni këpucë të posaçme për vrap. Sipas një studimi të vitit 2024 të publikuar në Journal of the Foot & Ankle, këpucët e duhura të vrapit mund të parandalojnë lëndimet dhe të përmirësojnë performancën.
Përfitimet e veshjeve të dedikuara për ushtrime
Pasi të keni gjetur një formë ushtrimi që ju pëlqen, konsideroni investimin në të paktën një palë veshje të dedikuara për ushtrime, këshillon Johnson. Kjo mund të përmirësojë performancën, komoditetin dhe madje edhe besimin në vete.
“Kam pasur klientë që vinin me trenerka të gjera, të cilat u pengonin gjatë vrapimit,” thotë ajo. “Pasi kaluan te streçet e ngushta, çdo gjë ndryshoi. U ndiheshin më të freskët dhe më rehat”, thotë ai.
E njëjta gjë vlen edhe për bluzat e gjera nëse ushtrimi juaj kërkon lëvizje të krahëve, si tenisi apo pickleball. “Zgjidhni bluza më të përshtatshme për trupin dhe ka shumë mundësi që të ndiheni më mirë,” thotë Johnson.
Por disa ekspertë paralajmërojnë për rrobat sportive që përmbajnë nivele të larta të bisphenol A (BPA), një kimikat sintetik i pranishëm në çorape, reçipeta sportive dhe bluza atletike. BPA është një substancë që mund të prishë balancën hormonale dhe të shkaktojë dëmtime zhvillimore dhe riprodhuese, sipas Center for Environmental Health.
Qendra këshillon njerëzit të kufizojnë ekspozimin ndaj BPA-së duke hequr rrobat sportive menjëherë pas stërvitjes dhe duke shmangur veshjet e bëra nga poliesteri.
Në fund të fundit, çfarë ka më shumë rëndësi?
Në fund, zgjedhja e veshjeve do të varet nga niveli juaj i angazhimit në aktivitetin fizik. Nëse përkushtoheni ndaj vrapimit, për shembull, këpucët e cilësisë së lartë mund të përmirësojnë performancën duke rritur efikasitetin tuaj në vrapim, thotë Hardwick.
Nëse preferoni çiklizmin, investimi në pantallona me mbushje dhe bluza të përshtatshme për trupin do t’ju bëjë eksperiencën më të këndshme, shton Johnson.
“Por nëse këto rroba janë një pengesë për ju nga ana financiare, mos u shqetësoni,” thotë ajo.
Hardwick pajtohet. “Më e shtrenjta nuk do të thotë gjithmonë më e mira,” thotë ai.
“Për sa kohë që ndiheni rehat dhe të sigurt, atëherë veshjet tuaja po e bëjnë punën e tyre”, përfundon ai. /Katror.info
Përgatiti:
