Astriakja Sophie Sorschag po ndihet tashmë pjesë e përfaqësueses së Kosovës. Sorschag të premten mbrëma përmes një postimi në rrjetet sociale ka vlerësuar mundësinë që të garojë për Kosovën.
Sorschag është garuese në kërcime me ski. Madje është garuese cilësore. Vjet ishte në Lojërat Olimpike, ndërsa më herët ishte kampione botërore në konkurrencë ekipore. Por Sorschag ka prishur marrëdhëniet me federatën austriake të skijimit dhe ishte në kërkim të një vendi tjetër për të përfaqësuar. Tashmë është zyrtarizuar marrëveshja që ajo të garojë për Kosovën. Ishin përmendur edhe destinacione të tjera, por në fund u arrit marrëveshja me Kosovën, shkruan Koha.
“Jam krenare të përfaqësoj në të ardhmen Republikën e Kosovës, Komitetin Olimpik, Federatën e Skijimit dhe gjithë popullin e Kosovës në kërcime me ski. Faleminderit të gjithëve që më krijuan këtë mundësi, sidomos mbarë familjes sime, trajnerit Jure Radelj dhe familjes së tij. Po shikoj para drejt të ardhmes së suksesshme për të gjithë ne”, ka shkruar Sorschag.
Mundesh me e lexu edhe…
Sorschag është 24-vjeçare, ndërsa i ka disa suksese edhe në garat e Kupës së Botës, që janë kryesoret në këtë sport. Ajo vlerësohet me potencial për të fituar medalje të mëdha për Kosovën në të ardhmen. Punon me trajnerin slloven Radelj, ndërsa marrëveshja që Sorschag të garojë për Kosovën është firmosur më herët këtë javë.
Sorschag është sportistja më cilësore që Kosova ka natyralizuar deri më tani. Ajo ka marrë lejen nga austriakët që ta ndryshojë përfaqësuesen. Së shpejti pritet të pajiset me pasaportë të Kosovës.
Përgatiti:
