Në restorantin “Enoteca Maria” që gjendet në New York janë të angazhuara gjyshe nga vende ndryshme të cilat jo vetëm që sjellin mënyrën e gatimit nga vendet e tyre por shërbejnë edhe receta nga libri i recetave të familjes. Ato në gatime shpërndajnë gjithë dashurinë që kanë gjyshet.
“Enoteca Maria” gjendet në St George, një lagje e përgjumur e Staten Island që është krah ujit në Brooklyn, Nju Jork. Restoranti njihet për diversitetin kulturor duke shërbyer receta të kuzhinës nga e gjithë bota dhe këtë duke e bërë në mënyrën më autentike të mundshme.
Gjyshet e vërteta nga çdo vend anembanë globit ftohen dhe punësohen si kuzhiniere për të gatuar recetat që ato i gatuajnë në shtëpi dhe që janë të zakonshme për traditën e tyre, shkruan Akademi Pune.
Mundesh me e lexu edhe...
“Ne aspirojmë të ndërtojmë lidhjet kulturore përmes gjuhës universale të gatimit dhe si mënyrë kemi zgjedhur që jo vetëm ta shërbejmë por edhe ta mësojmë atë. Ne mbajmë klasa ku kuzhinierët aspirantë mund të kenë mundësinë të mësojnë nga gjyshet në kuzhinë”, shkruhet në përshkrimin e historisë së këtij restoranti.
Pronari i saj, Jody Scaravella ka rrëfyer se gjatë fëmijërisë prindërit e tij ishin vazhdimisht të zënë me punë. Dhe personi që kujdesej për të ishte gjyshja e tij italiane, Domenica. Ajo kishte përcjellë me zemër kulturën dhe traditat e vendlindjes së saj.
“Më kujtohet që ajo shkonte çdo ditë në treg duke sjellë karrocën e saj të blerjeve. Ajo ndalonte në dyqanet e perimeve dhe kafshonte një pjeshkë ose shijonte një qershi, dhe nëse ishte e mirë, ajo i blinte, përndryshe e pështynte në tokë me një shprehje të neveritshme në fytyrën e saj. U habita që askush nuk u ankua për këtë por në fund të fundit të gjithë e njihnin gjyshen”, ka rrëfyer ai.
Tutje Scaravella shprehet se duke u rritur e kuptoi më mirë se gjyshja kishte qenë depoja e kulturës dhe identitetit të gjithë familjes. Kështu duke i bërë gjyshet bashkë në kuzhinë, ai sot lidh identitete të ndryshme nga mbarë bota.
“Dhe kuptova se, si ajo, miliona gjyshe në mbarë botën ua përcjellin trashëgiminë e tyre nipërve”, ka theksuar ai.
Në vitin 2008 i nxitur nga dëshira për të ndarë kulturën e kuzhinës së gjysheve italiane, ai hapi një restorant me emrin “Enoteca Maria”. Në Enoteca disa gjyshe italiane nga rajone të ndryshme italiane gatuajnë menutë e tyre. Hapi tjetër në korrik të vitit 2015, ai u ka bërë ftesë gjysheve të vendeve të ndryshme për të gatuar në restorant.
Vitet e fundit, darkat e fundjavës së restorantit janë gatuar nga gra më të moshuara, të përshkruar nga Scaravella si “Nonnas of the World”, (Gjyshet botës) të cilët ofrojnë menu të plotë bazuar në kuzhinat e tyre shtëpiake. Ai më pas mori iniciativë të krijoj edhe një libër që përmbledhë recetat e tij. Aty çdokush nga bota mund të shkruaj biografinë e shkurtër të gjyshes, 3 foto dhe një recetë (të shkruar në gjuhën e tyre amtare).
“Vizioni im është që ky libër të bëhet koleksioni më i gjerë i recetave të gjysheve, dialekti dhe kujtimet e tyre të veçanta, një dëshmi e kulturës kulinare të njerëzve të thjeshtë nga e gjithë bota”, ka thënë ai.
Kultura është një burim që ia vlen të ruhet. Në fund të fundit, një pemë nuk mund të rritet dhe të ndryshojë pa rrënjët e saj – është mesazhi i këtij restoranti./Katror.info
Përgatiti:
