Kuriozitetin për yoga e ka pasur në nivel gjithmonë. Ka lexuar e hulumtuar për të si formë medituese e përmirësim të shëndetit. Por, po të pyetej vite më parë nëse do ta kishte rastin ta përjetonte në moshë të pensionit, ka dyshime nëse përgjigja do të ishte pozitive.
Valbona Hapibajt iu është plotësuar një prej dëshirave të saja të kahmotshme në “Yoga 50 plus” në krye me trajneren Driada Matoshi. Tash e dy vjet ajo bashkë me bashkëmoshataret e saj gjen harmoninë e jetës pikërisht në muret e kësaj hapësire. Dhe jo veç që e bën balancin mes anës shpirtërore e fizike, por e ka edhe një aktivitet për dallim nga pensionistet e tjerë për të cilët nuk ka po thuajse asnjë organizim në vend.
“U njoftova nëpërmjet vajzës së madhe Sarës, në portale e ka pa që po fillon grupi i yogas, t’u e ditë që unë shumë kam qejf, edhe shumë ma përpara kam qenë e interesume, kanë ekzistu grupet e yogas, por për moshën tonë sa herë që kam kërku me shku më kanë thanë nuk ka vend. Kjo ishte specifike plus 50, atëherë u lajmërova në telefon më tregun cilën ditë me ardh, atë ditë ka qenë 11 tetori, e martë në mëngjes në 10 kam shku, u njoftova me mësuesen, na e thirrim kështu edhe pse është trajnera jonë Driada Matoshi,” shprehet ajo.
Mundesh me e lexu edhe…
Për artisten Driada Matoshi, yoga nga shkalla personale u shtri te një aktivizëm qytetar të llojit të vet. Ajo përveçse ushtron një prej pasioneve të saj, edhe ofron forma alternative të aktiviteteve për këtë gjeneratë. Kështu edhe duke u bërë një prej iniciatiavave të para e pothuajse të vetme për moshën 50 plus.
“Ka qenë një iniciativë shumë e qëlluar dhe e nevojshme për Kosovën sepse grupmosha plus 50 ose edhe ata pas 60 ose 65 varet kush del në pension më herët apo më vonë, automatikisht iu ulet numri i aktiviteteve ditore. Kosova ofron mos të themi mundësi minimale për aktivitete, shoqërim dhe mirëmbajtje të shëndetit të kësaj grupmoshe, ” thotë për Katror Media, Driada Matoshi.
E ajo që i merr të mirat e yogas tash e dy vjet është edhe ish profesoresha e orientalistikës e turkologjisë në Fakultetin Filologjik, Suzana Canhasi.
“Shumë mirë është, e ndjen veten që e ke një obligim me shku. Unë duke e krahasu veten me vitet përpara si kam qenë, psiqikisht edhe fizikisht shumë më ka ndiku. Ma së pari fizikisht për nyjet ma lehtë zgjohem e ulem, më gjatë eci. Për psiqikë jam shumë më pozitive, më e durueshme edhe jetën e shoh më pozitive. Krejt kjo nga ndikimi i yoga-s,” thotë ajo.
Iniciativa e nisur me dy tri gra, tashmë numëron gati 20 të regjistruar dhe të ndarë në terminin e paradites e të pasdites. Ndërkaq trajnerja Matoshi ka një mesazh për fushat e tjera të sportit për sigurim të përfshirjes së kësaj moshe.
“Është shumë e rëndësishme me pasë aktivitete të ndryshme jo veç yoga, na kemi sporte të ndryshme që të gjitha munden me u adaptu për këtë grupmoshë. Unë sugjeroj që secili instruktor i ndonjë sporti, pavarësisht çka është, vrapimi, fitnesi, gjimnastika, pilates, kemi sporte pafund që munden me u adaptu për këtë grupmoshë,” tha ajo.
Pjesëtaret e “Yoga 50 plus” janë me fat teksa bashkëmoshatarët e tyre nëpër qytete të tjera nuk kanë mundësi të njëjtë për shumicën e sporteve e rekreacioneve.
Të mirat e saj në aspektin fizik janë rritja e fleksibilitetit dhe forcës, energjisë e vitalitetit, frymëmarrja e përmirësuar si dhe ndihmesa për shëndetin kardiak e qarkullim të gjakut. Ndërkaq në aspektin mental yoga ndihmon në relaksimin e qetësimin e mendjes, përqendrimin e vëmendjes si dhe largimin e stresit.
Në vitin 2022 sipas Agjencisë së Statistikave të Kosovës janë evidentuar 144 mijë pensionistë. Sipas publikimit “Rezultatet e Anketës së Buxhetit të Ekonomive Familjare 2022”, 35% e pensionistëve janë me arsim fillor, 11% janë me arsim të mesëm ndërkaq 8% me shkollim më të lartë. /Katror.info
Edicionin #14 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
