Është e pamundur të eliminoni plotësisht stresin në punë, por është e mundur të reduktoni rrezikun e burnout me një ndryshim të thjeshtë në rutinën tuaj, sipas Nicholette Leanza, psikoterapiste me qendër në Beachwood, Ohio.
Sipas Organizatës Botërore të Shëndetësisë, një nga shenjat e para të burnout është ezaurimi i energjisë. Ju mund ta keni gjithnjë e më të vështirë të përqendroheni në detyrat në punë, apo të ndiheni më pak të motivuar për të bërë punën tuaj.
Kur ndodh kjo, Leanza këshillon një praktikë të thjeshtë, e cila mund ta mbrojë trurin tuaj nga stresi dhe ta nxisë për të qenë më produktiv – balancimi i aktivitetit.
Ja se si funksionon: Çdo herë që ju ngarkohet një punë e vështirë apo stresuese, ndërthureni me një aktivitet që ju çlodh apo ju jep gëzim.
Për shembull, mund të dëgjoni muzikën tuaj të parapëlqyer ndërkohë që i përgjigjeni një email-i të bezdisshëm, ose t’u bëni duarve një masazh në një takim të gjatë dhe rraskapitës.
“Përfshirja e aktiviteteve të vogla të kujdesit ndaj vetes në rutinën tuaj të punës ju ndihmon me të vërtetë në uljen e tensionit – thotë Leanza. – Kur truri bllokohet në një skemë mendimi negativ dhe ankthi shtohet, është shumë e vështirë të përfundoni çdo gjë, e jo më të mendoni me kthjelltësi.
Ndërthurja e aktiviteteve – shton Leanza, ju ndihmon të identifikoni strategji të shëndetshme për t’u përballur me stresin dhe të praktikoni disa kufij të butë në punë, në mënyrë që “edhe nëse nuk e doni punën tuaj, të jetë më e tolerueshme”.
Studimet tregojnë se të ecësh në natyrë, të dëgjosh muzikë, të luash me një kafshë shtëpiake apo të meditoni, të gjitha mund të nxisin çlirimin e hormoneve që ju bëjnë të ndiheni më mirë, si dopamina, serotonina dhe endorfina.
“Ndërthurja e punës me aktivitetet çlodhëse gjithashtu mund të lehtësojë stresin dhe të merrni në kontroll situatën ku ndodheni” – thotë Leanza.
“Ky është sekreti i ruajtur më mirë për të parandaluar burnout”.
Përgatiti:
