“Unë asnjëherë nuk mendoj me lanë punën vullnetare, çdo herë që mu më jepet një mundësi për me kontribu diçka për komunitetin tonë, gjithmonë domethënë do të jem e gatshme.”
Filloi me punë vullnetare që kur ishte 15 vjeçe. Ndihmoi të tjerët, dhe pa e menduar vullnetarizimi u kthye edhe në të mirën e saj.
Leona Jahiri, studentja dhe aktivistja nga Ferizaj, që nga viti 2012 si nxënëse e shkollës fillore mori pjesë në në mënyrë vullnetare në aktivitete të ndryshme në të mirë të komunitetit. Në vitin 2019 u shpall vullnetarja e vitit nga Komuna e Ferizajt. Sot është kryetare e Parlamentit Studentor në Universitetin e Ferizajt.
Mundesh me e lexu edhe…
“Atëherë, qysh prej fëmijë, kam pasë qejf me u aktivizu në organizata të ndryshme, në organizime që janë bërë brenda shkollës, kështu që në klasën e pestë ose gjashtë eventualisht të shkollës fillore veçse kam marrë pjesë atëherë domethënë u mbajshin zgjedhjet për kryetare të shkollës, domethënë në atë kohë, jam aktivizu, pas asaj kam fillu me marrë pjesë në organizata të ndryshme joqeveritare, kombëtare dhe ndërkombëtare në të cilat kemi bë punë vullnetare për komunitetin.”
Leona nuk u ndal me kaq. Së bashku me aktivistë të tjerë, ndërmorën nisma për përfshirjen e të rinjve të kësaj komune në aktivitete që kishin për qëllim avancimin e të drejtave të grave, pajisjen e të rinjve me njohuri në fushën e teknologjisë, informatikës, artit, kulturës e fushave tjera.
“Domethënë jemi mundu me u përfshi në krejt fushat që me mujtë sa më shumë m’i aktivizu të rinjtë të komunës. Pas një kohe, pas katër viteve që kam bërë punë vullnetare brenda komunitetit tonë përkatësisht në qendrën e Kulturës dhe Organizatat joqeveritare që kanë qenë në Ferizaj, unë e kam marrë pjesë në zgjedhjet që kanë qenë domethënë për përfaqësimin e shkollave të mesme në Këshill drejtues të nxënësve të Kosovës, ku prej aty kemi qenë zëri i krejt shkollave të mesme dhe bashkëmoshatarëve të mi në aspekte të ndryshme edukative, të cilat na kanë interesu domethënë neve.”
Puna vullnetare e gërshetuar me dijet e fituara gjatë shkollimit, aktivizmit, dhe rrjetëzimit fuqizuan Leonën, e cila ndërmori hapin e rëndësishëm që të ngrisë një biznes që në moshën 16 vjeçare.
“Më e mira prej punës vullnetare, e cila nuk paguhet me mjete financiare, domethënë këtë e dimë krejt, po është një e mirë. Unë për vete kam përfitu shumë prej punës vullnetare, jo në mënyrën financiare, po kam njoftë shumë njerëz prej fushave më të ndryshme, jam avancu në aftësitë e mia personale dhe njëkohësisht e kam fitu një vetëbesim shumë të madh.Kjo më ka shty për me kontribu në komunitetin tim edhe për me u ballafaqu me situata të ndryshme, përpos që unë kam fitu prej të mirave të punës së zanatit, ka përfitu edhe komuniteti prej punëve të cilat na i kemi bërë brenda kësaj.”
Leona sot është njëra nga ndërmarrëset më të reja të Komunës së Ferizajt. Edhe pse rrethanat e pamundësuan funksionimin e biznesit të saj për një kohë, megjithatë, Leona rimëkëmbjen dhe zgjidhjet e situatave thotë se i gjeti falë angazhimeve dhe gjeturisë që kishte fituar nga puna vullnetare.
“… në moshën tetëmbëdhjetë vjeçare e kam arritë me hapë dyqanin, po ka ra situata me pandeminë edhe rrethanat e ndryshme na kanë detyru me mbyllë lokalin edhe mund me marrë me mend, domethënë krejt investimi ka shku huq. Por, u kanë ajo forca që e kam mësu nga të mirat e punës së zanatit që më kanë mësu qysh me i elaboru ato, atë periudhë edhe me u ngrit prapë në këmbë edhe me fillu diçka të re dhe mos me u dorëzu. Po besoj që nëse nuk isha marrë me punë vullnetare, nuk kisha njohur aq shumë njerëz, nuk ka pasë kush me më dhënë motiv, që unë me vazhdu punën edhe me arritë deri këtu ku jemi sot. Në momentin që ekziston dëshira dhe vullneti, asgjë nuk është e pamundshme.”
Gjithëpërfshirja dhe zgjerimi i rrjetit të aktivistëve është çelësi i suksesit.
“Një ndër qëllimet tona ka qenë që me marrë afër vete sa më shumë shokë, shoqe, domethënë rrethin dhe m’u aktivizu gjithë së bashku. Se në momentin që na e kemi bërë një punë vullnetare në mënyrë ekipore, ajo ka pasë sukses shumë më të madh. Mundem me thanë që përfitimin më të madh që unë si individ e kam pasur në punë vullnetare është që e kam arritë qysh në moshën domethënë 16-të vjeçare me fillu biznesin tim personal, biznes që tash ka të punësar gra domethënë në veprimtarinë e gastronomisë.”
Edhe pse koha dhe mënyra dinamike e jetesës mund të jetë një faktor pengues në kryerjen e punëve vullnetare, sidoqoftë Leona ka një sistem të mirë të organizimit të kohës.
“D.m.th në momentin që ke dëshirë dhe ke vullnet, mundesh me i mbërri dhe me i kompletu krejt sendet brenda ditës.”
Sipas një raporti të Demokracisë për Zhvillim (D4D), vullnetarizmi në Kosovë ndryshon edhe në bazë të gjinisë. Gratë kanë një nivel më të ulët të vullnetarizmit për dallim nga burrat. Mirëpo të rejat si Leona po bëjnë dallimin pozitiv në shoqëri.
“Në fillim kur të hysh me një organizatë joqeveritare, ose kur t’ia nish me ba një punë vullnetare nuk duket shumë atraktive derisa të krijohet ai rrethi i njerëzve që të të bëjnë çdo ditë e më shumë për me kontribu për komunitetin… thjesht ajo energjia, ato takimet që i kemi bërë me njëri-tjetrin, ato kafe që i kemi pirë bashkë, informacione që i kemi shkëmby me njëri-tjetrin, koha e mirë që e kemi kalu na ka shty çdo ditë e më shumë për me bo diçka të re për kombin, se komuniteti neve na ka bo bashkë, edhe kjo është ajo gjëja më e mirë e thelbi i krejt kësaj pune. Kështu që unë i inkurajoj të gjithë bashkëmoshatarët e mi studentët domethënë që janë edhe më të rinj, që janë në moshë, po edhe që janë më të vjetër me kontribu diçka për komunitetin e tyre, pasi që qajo e mira e komunitetit ka me u kthy prapë.”
Angazhimi vullnetar për Leonën tashmë është mision jetësor. Ajo nuk mendon asnjëherë të heq dorë nga puna vullnetare, sepse siç thotë ajo aktivitetet e ndryshme vulletare të lidhin më shumë me botën dhe të bëjnë të jesh një hap përpara.
“Unë asnjëherë nuk mendoj me lanë punën vullnetare, çdo herë që mua më jepet një mundësi për me kontribu diçka për komunitetin tonë, gjithmonë do të jem e gatshme, edhe pse për momentin fushëveprimtaria është në pjesën e biznesit, prapë se prapë çdo herë domethënë ka vend për punë vullnetare, se puna vullnetare nuk e ka një moshë të caktume.”
Sipas një studimi për Vullnetarizimin në Kosovë nga Zyra për Qeverisje të Mirë, mbi 70 për qind të të anketuarve mendojnë se vullnetarizmi është shumë dobiprurës dhe 19 për qind mendojnë se është i dobishëm deri diku. Gjithashtu studimi thotë se vetëm 43,1 për qind prej tyre kanë deklaruar se do të bëheshin vullnetarë po t’u jepej mundësia.
Ndërkaq, vullnetarizmi në Kosovë është i rregulluar me ligj. Inkurajimi dhe promovimi i vullnetarizmit në Kosovë, është një nga katër objektivat strategjike të parashikuar në Strategjinë Qeveritare për Bashkëpunim me Shoqërinë Civile 2019-2023. /Katror.info
Edicionin #39 të plotë e gjeni KËTU 🙂
Përgatiti:
