Në fillim të pandemisë, situata ishte shumë delikate. Pasi u gjendën në një vorbull distopike, punonjësit duhej ta kryenin punën e tyre sa më mirë që të mundeshin, ndërkohë që pyesnin veten kur gjërat do të ktheheshin në normalitet.
Por sot termi “normale” ka një kuptim të ri dhe përmes inovacionit, kompanitë moderne e kanë tejkaluar reagimin ndaj pandemisë, dhe kanë gjetur mënyra të reja dhe më të mira pune.
Në vazhdim përmenden disa nga mënyrat se si puna ka ndryshuar që nga pandemia.
Mundesh me e lexu edhe...
Punonjësit kanë përparësi të reja
Duke provuar balancën punë-jetë që vjen me punën fleksibël, 53% e punonjësve në mbarë botën, kanë më shumë gjasa t’i japin përparësi mirëqenies sesa punës, sipas Indeksit të Trendit të Punës 2022 të Microsoft (2022 Work Trend Index).
Elasticiteti është gjithashtu një nga objektivat kryesore të Kornizës së Punës së Mirë (Good Work Framework) të Forumit Ekonomik Botëror (World Economic Forum, WEF), i cili përshkruan vizionin e tij për të ardhmen e punës së shëndetshme, elastike dhe të barabartë.
WEF synon të ndihmojë kompanitë të zhvillojnë strategji për të promovuar punën e mirë në të gjitha llojet e punësimit, për mirëqenien e biznesit dhe shoqërisë.
Historikisht, disa biznese kanë luftuar për të tërhequr punonjës për shkak të vendndodhjes gjeografike.
Por puna në distancë e ka lehtësuar këtë problem, sipas Anketës së Shpresave dhe Frikës së Fuqisë Punëtore të PwC Global (PwC Global Workforce Hopes and Fears Survey).
Sondazhi zbuloi se punëtorët hibridë janë më të kënaqur me punën e tyre, 62% parapëlqejnë një kombinim midis punës në zyrë dhe në distancë.
Ai gjithashtu konfirmoi se fleksibiliteti është thelbësor për tërheqjen dhe ruajtjen e talenteve.
Koncepti i produktivitetit ka ndryshuar
Punonjësit që nuk duhet të përballen me stresin e një udhëtimi, janë në një gjendje më të mirë mendore kur fillojnë punën, dhe për këtë arsye janë më produktivë.
Sfidat kryesore për një organizatë me një fuqi punëtore hibride, janë të sigurojë që punonjësit të jenë të angazhuar, të shmangin burnout dhe të ndihen sikur janë pjesë e ekipit, pavarësisht se ku ndodhen.
Mjetet për të lehtësuar bashkëpunimin dhe komunikimin janë thelbësore, si në mjedisin e punës, ashtu edhe në ndërveprimet me klientët.
Mënyra se si kompanitë komunikojnë me klientët ka ndryshuar përgjithmonë dhe organizatat që riprojektojnë dhomat e konferencave për të përqafuar realitetin e ri hibrid, do të përmirësojnë përvojën e stafit dhe klientëve.
Disa organizata kanë frikë se produktiviteti do të ulet kur të përqafojnë fleksibilitetin.
Si mund t’u besojnë njerëzve që të bëjnë punën dhe të arrijnë rezultatet e dëshiruara, pa mikromenaxhuar detyrat e vartësve të tyre?
Amy Loomis, zëvendëspresidente e kërkimeve në IDC’s The Future of Work, thotë se kompanitë duhet të shikojnë matësit e suksesit.
Në vend që të përqendrohen vetëm përfundimin e detyrës, ato duhet të marrin në konsideratë përvojën dhe vlerësimet e klientëve.
Punonjësit duan të ndihen të vlerësuar
Kompanitë që kanë përqafuar mjetet për mësimin dhe trajnim bashkëpunues, po shohin përfitime në biznese të reja, si dhe rritje të kërkesës nga klientët ekzistues.
Teknologjitë e reja, automatizimi dhe Inteligjenca Artificiale (AI), sjellin gjithashtu mundësi për kursim kosto dhe gjenerim të ardhurash, të cilat ndikojnë pozitivisht në fuqinë e punës hibride dhe në distancë.
Një raport i fundit nga McKinsey thekson se, mendësia e punonjësve europianë ka ndryshuar që nga fillimi i pandemisë dhe kompanitë duhet të vazhdojnë të ofrojnë elasticitet, nëse duan të ruajnë talentin e tyre më të vlefshëm.
Raporti thekson se shfaqja e një përkushtimi ndaj punonjësve, që është edhe “i përgjithshëm dhe individual”, është shumë i rëndësishëm për shëndetin e kompanive dhe rritjen e ardhshme.
Nuk ka një vend pune që i përshtatet të gjithëve
Kompanitë që dëshirojnë të kenë sukses në botën e re të punës, duhet të dëgjojnë me vëmendje si punonjësit ashtu edhe klientët, në mënyrë që të minimizojnë pakënaqësitë e stafit dhe të rrisin kënaqësinë e klientit. /Katror.info
Përgatiti:
