Fuqizimi i grave në Mitrovicë përmes agro-turizmit

Ka shtatë vjet që e ka lënë qytetin për fshat, duke i kushtuar kohë të plotë zhvillimit të agroturizmit.

Është kjo Valbonë Shyti-Ferati, e cila po merret me bujqësi e blegtori në fshatin Vllahi të komunës së Mitrovicës, bashkë me familjen e saj. E pyetur se pse e la qytetin dhe vendosi të jetojë në fshat Valbona u përgjigj:

“Kam vendosur prej qytetit me u kthy në fshat, se shkollën nuk e kam vazhdu, veç shkollën e mesme, dhe kam dashtë me qenë vetë pronare e biznesit tem; me hap një biznes. E kam gjetë veten këtu në fshat me produktet krejt bio. Tash mendoj me i hap edhe bujtinat dhe me i ftu njerëzit për vizitë,” – Valbona Shyti-Ferati –

Po këto nuk janë produktet dhe shërbimet e vetme që ajo ofron.

” Ne gatuajmë edhe flia, t’u e marrë parasysh që është gjithçka bio dhe me mazë të fshatit. E kemi seren ku e kultivojmë spanaqin dhe gatujmë pite me spanaq. Kemi kunguj të fshatit. Pra, gjithçka asht bio. E t’u e pa njerëzit që ushqimi bio asht shumë ma kualitativ se këto ushqimet e pregatituna shumë shpejt edhe interesimi i njerëzve na ka shty edhe ma shumë më u rritë. Kërkesa e njerëzve asht shumë e madhe.” – Valbona Shyti-Ferati –

E plot entuziazëm ajo tregon se sa atraktive jeta në fshat është për vizitorët dhe sa potencial ka agro-turizmi në këtë zonë.

” Kur njerëzit që vijnë me fëmijë, e kur fëmijët e shohin bagëtinë, i shohin qingjat, i shohin zogjtë vijnë me padurim e me vrap. Nuk e besoni sa me shpejtësi vijnë për t’i shiju, për t’i prekë të gjallë kafshët, se prej lodrave plastike janë mërzitë.” – Valbona Shyti-Ferati –

Valbona tregon se për të ngritur kapacitetet e saj ajo po ndjekë trajnime të ndryshme që ndërlidhen me agro-turizmin, meqë i konsideron të rëndësishme dhe frytdhënëse. E ndër këto trajnime e aktivitete të dobishëm e pa edhe takimin e organizuar nga CECD Friends.

” Në këtë tubim që është bërë ne kemi shkëmbyer shumë ide e shumëçka në mes vete dhe kemi pa një sukses prej tyre.” – Valbona Shyti-Ferati –

Që nga viti 2015 organizata CECD Friends ka arritur që në vazhdimësi të fuqizojë të rinjtë dhe gratë në sfera të ndryshme të jetës dhe të avokojë për nevojat dhe problemet me të cilat ata ballafaqohen.

E e certifikuar me ISO standardet për të ofruar shërbime të edukimit dhe trajnime që ndërlidhen me edukimin, zhvillimin ekonomik dhe shëndetësinë, së fundmi kjo organizatë ka marrë përsipër që të ngrisë njohuritë dhe kapacitetet e grave të Mitrovicës në sferën e agro-turizmit.

E për qëllimin e aktivitetit dhe specifikat e tjera na foli më në detaje vetë drejtoresha e organizatës, Valbona Sadiku.

” Sot jemi këtu në fshatin Vllahi. Jemi mbledh me gratë. Është një ditë diskutimi ku kemi me i njoftu gratë për procesin e projektit.” – Valbona Sadiku –

Valbona shpjegon se përgjatë ditëve në vijim, 34 gra të fshatrave të komunës së Mitrovicës do të ngrisin kapacitetet e tyre në agro-turizëm në pesë modulet e përgatitura nga ekspertët e organizatës, për të vazhduar tutje me promovimin, brendimin dhe shitjen e produkteve të tyre në një panair tre ditor.

” Të gjitha këto gra pjesëmarrëse që janë sot bashkë me ne, janë të gjitha gra të cilat merren me zhvillim të turizmit, me përpunim të ushqimit tradicional dhe artizanateve, e që ka qenë një ndër objektivat për të qenë pjesë e trajnimeve në vazhdim.” – Valbona Sadiku –

Një iniciativë e tillë po pritet jashtëzokonisht mirë nga gratë pjesëmarrëse, të cilat u treguan entuziaste për mundësinë për aftësim.

I kënaqur u nda edhe Elvis Feka, drejtor i Zhvillimit Ekonomik dhe Turizmit në Komunën e Mitrovicës i cili mori pjesë në këtë aktivitet.

” Unë jam shumë i lumtur sot që jam pjesë e këtij organizimi dhe kur po shoh një zhvillim kaq të madh ndaj përkrahjes së grave në pjesën e zhvillimit të turizmit rural. Fatmirësisht kjo iniciativë ka ardhë prej një organizate lokale siç është CECD Friends.” – Elvis Feka –

Sipas tij, CECD Friends ka pasur një vizion të qartë se si të përkrahen gratë e zonave dhe si të promovohet turizmi rural përmes aktiviteteve gjë që e ka nxitur edhe Drejtorinë që ai udhëheqë të përkrahë iniciativën e kësaj organizate. Madje ai u shpreh se të tilla organizata arrijnë të përfaqësojnë më së miri nevojat dhe kërkesat që dalin nga komuniteti.

” Organizatat padyshim që janë një shtyllë shumë e fortë e pjesës së bashkëpunimit tonë si institucion edhe si komunë për shkak se përmes tyre shprehen shpesh herë problemet edhe telashet që munden me qenë në komunitetin tonë.” – Elvis Feka –

E që iniciativa të tilla kanë arritur nërgjegjësimin e vajzave dhe grave, e dëshmon edhe Valbona e cila tashmë ka ndërmarrë një hap të tillë dhe po synon të zgjerojë veprimtaritë e saj agro-turistike.

“Çdo grua e cila jeton në fshat ia vlen më punu. Ia vlen ma së pari për veten. Është nder. Puna është nder. Puna është kënaqësi. Ia vlen me punu për të ardhurat e veta, për të ardhurat e familjes së vet dhe asht një kënaqësi shumë e madhe.” – Valbona Shyti-Ferati –

Edicionin #30 të plotë e gjeni KËTU 🙂