Janjeva, që dikur njohej si një qendër e njohur e xehetarisë, zejtarisë, shkrirjes dhe përpunimit të metaleve, nga argjendi e ari, e më pas edhe plastikës, po kërkon rikthimin e namit të dikurshëm, të paktën në ringjalljen e histories.
Sipas gjetjeve arkeologjike, konsiderohet se Janjeva është lokalitet mjaft i lashtë. Këtë e dëshmojnë mbishkrime të shumta që janë gjetur në këtë vend. Në dokumentet e shkruara, përmendet për herë të parë në vitin 1303.
Ministria e Kulturës, Rinisë dhe Sportit përmes një njoftimi në Facebook ka treguar se me intensitet të lartë po vazhdon puna në restaurimin dhe rifunksionalizimin e shtëpive tradicionale në Janjevë.
Punimet që janë pjesë e projektit “Trashëgimia kulturore si nxitës për ringjalljen ekonomike të Janjevës”, I kanë parë nga afër ministri i Kulturës, Hajrulla Çeku, ambasadori i BE-së në Kosovë, Tomas Szunyog, përfaqësuesja e përhershme e UNDP-së, Maria Suokko, Nedjelko Spilekti, konsull në Ambasadën Kroate në Kosovë dhe partnerë tjerë të projektit.
Mundesh me e lexu edhe...
Sipas Ministrisë, restaurimi i shtëpive do të kontribuojë në ringjalljen e historisë dhe inkurajimin e ruajtjes së trashëgimisë së pasur kulturore, po ashtu të krijojë mundësi për ringjallje socio-ekonomike duke promovuar turizmin lokal.
Me 1.4 milion euro nga Qeveria e Republikës së Kosovës dhe 2 milion nga Bashkimi Evropian, projekti “Trashëgimia Kulturore si Nxitëse për Ringjallje Ekonomike të Janjevës” filloi zbatimin, me fokus në mbrojtjen e trashëgimisë kulturore dhe sigurimin e ringjalljes socio-ekonomike ku parashihen ndërhyrje restauruese dhe revitalizuese në 13 shtëpi të vjetra, hartimi i Strategjisë për Zhvillim të Turizmit Kulturor dhe Natyror, fuqizimi ekonomik dhe ngritja e kapaciteteve lokale për zhvillim të qëndrueshëm lokal, e mbështetja e komunitetit përmes granteve.
Janjeva, po ashtu, është vendlindja e Shtjefën Gjeçovit, veprimtar i shquar i lëvizjes atdhetare, etnograf, arkeolog dhe shkrimtar shqiptar.
Nga një qendër kaq e njohur shumë kohë më parë, historia e Janjevës ka ndryshuar shumë.
Në ditët e sotme, komuniteti pakicë i kroatëve që jeton në Janjevë, lufton për mbijetesë dhe përballet me kushte shumë të rënda ekonomike, gjë që edhe është arsye për largimin e shumë banorëve, të cilët kërkojnë jetë më të mirë./Katror.info
Përgatiti:
