Në Prishtinë sot filloi Java Globale e Ndërmarrësisë, me Innovation Centre Kosovo (ICK) si nikoqire shtetërore e kësaj jave që shënon një ndër ngjarjet më të mëdha të ndërmarrësisë në botë. Uranik Begu para pjesëmarrësve të edicionit të 11-të mbajti fjalimin e tij, të cilin tha se shkruajti me ndihmën e ChatGPT-së.
“Kjo javë është simbol i krejt asaj çka ne përfaqësojmë. Është javë e unitetit, është javë ku ne i bashkojmë forcat që me të vërtetë me e shndërru këtë vend në një vend të cilin e meritojmë dhe të cilin më shumë se çdokush tjetër e meriton kjo rini t’cilët i përshëndes,” tha Begu.
Ai u shpreh se rëndësia e ndërmarrësisë dhe zhvillimit të saj ka përfitim multidimensional në Kosovë, sepse krijon vende pune, kushte për zhvillim teknologjik dhe ide inovative që mund të ndikojnë në fuqizimin ekonomik të vendit.
Kryetari i Prishtinës, Përparim Rama tha se Prishtina i njeh nevojat, sfidat por edhe potencialin që ka Kosova e specifikisht kryeqyteti për të zhvilluar veprimtari të ndryshme inovative.Sipas tij Komuna e Prishtinës bashkë me ICK-në po shfrytëzon hapësirat e ndërtesat publike për të rinjtë.
“Për sa i përket infrastrukturës, me kënaqësi mund të themi se kemi disa ndërtesa ikonike në Komunën e Prishtinës si Pallati i Rinisë, të cilat tani së bashku me ICK-në i kemi lejuar dhe për momentin jemi duke bërë një projekt të ri që quhet “Unaza/The ring”, përreth hapësirës madhështore që përdorej për sport, basketboll. Pra, është një hapësirë potenciale në të cilën ne po krijojmë një hapësirë për bizneset pop-up. Kështu, hapësirat si Pallati i Rinisë, Tulltorja e vjetër e qytetit dhe vende të tjera do të jenë në dispozicion të të gjithë atyre që kanë nevojë për ambiente pune dhe që ju nevojiten hapësira të sigurta për të jetësuar idetë dhe nismat e tyre,” tha Rama.
E entuziast e plot pozitivitet gjatë fjalimit të tij ishte edhe Ambasadori i Suedisë në Kosovë, Jonas Westerlund, i cili shprehu kënaqësinë e tij për bashkëpunimin me ICK-në dhe rezultatet që po dalin nga ky bashkëpunim.
“Përpara se të mbështesim ICK-në për një kohë shumë të gjatë, kur erdha 18 muaj më parë si ambasador, mendova se ekziston një vakum i caktuar në promovimin e bizneseve këtu. Kështu, fillova të vendos energjinë time në mbështetjen e ndërmarrësve dhe bizneseve të reja në Kosovë,” tha ambasadori Westerlund.
Ai shpjegoi si inovatorët suedezë të cilët kanë arritur të bëjnë ndryshime globale në fushën e teknologjisë, inovacionit dhe ndërmarrësisë kanë të përbashkëta dhe ngjashmëri me ndërmarrësit dhe inovatorët kosovarë, duke bërë kështu një krahasim mes themeluesit të Spotify dhe atij të Gjirafa-s.
“Siç thashë ICK është një organizatë fantastike dhe është gjithmonë plot entuziazëm kur vij. Më kanë bërë përshtypje të gjitha kompanitë e tjera si Gjirafa – kur lexoni për Gjirafën dhe historinë rreth Gjirafës dhe fillimet e saj, dhe nëse lexoni për themeluesin e Gjirafës mund të shihni ngjashmëri të madhe me Daniel Ek, themeluesin e Spotify dhe rrugën që ai ka ndjekur- kështu kjo është fantastike,” tha ai.
Sipas Westerlund, shembuj të tillë të bashkëpunimit dhe ndërmarrësve të suksesshëm vazhdojnë të forcojnë gatishmërinë e Ambasadës Suedeze për të vazhduar mbështetjen dhe përkrahjen drejt zhvillimit të Kosovës dhe krijimit të një mjedisi të përshtatshëm për lulëzim ekonomik.
“Të jeni të sigurt, qe do të vazhdojmë të mbështesim ICK-në, ne do të vazhdojmë të mbështesim kryetarin e Prishtinës dhe Kosovën në rrugën që të mund të konkurrojmë ndoshta me Singaporin, Suedinë apo SHBA-në në të ardhmen,” tha ai.
Shefi i Bankës për Zhvillim dhe Rindërtim, Sergiy Maslichenko tha se ky institucion ka mbështetur ICK-në dhe Javën e Ndërmarrësisë që nga viti 2013.
“Kjo javë është shembulli më i mirë dhe së bashku me 70 partnerët tanë me synimin për të shpalosur dhe ndarë mundësitë për të rinjtë për të krijuar të ardhmen në vendin e tyre. Pra, faleminderit shumë ICK-së për realizimin e kësaj.”
Frosina Islami, përfaqësuese e Coca Cola HBC Kosova shprehu entuziazmin e saj për përfaqësimin 50 % të grave në programet e lidershipit.
“Është një nder i veçantë që jam këtu me ju sot dhe përfaqësoj Coca Cola HBC Kosovën, dhe jo vetëm kaq, por jam gjithashtu shumë e nderuar dhe e përulur që përfaqësoj atë që shpresoj të jem 50% e grave në programet e lidershipit në Kosovë.”
Sipas Islamit, Java e ndërmarrësisë paraqet një mundësi të mirë për ndërmarrësit dhe liderët e rinj kosovarë që të shfaqin talentin e tyre, por dhe të tregojnë se çfarë mund t’i ofrojnë tregut kombëtar e atij ndërkombëtar./Katror.info
Përgatiti:
