Presidentja e Republikës së Kosovës, Vjosa Osmani, hapi edicionin e tretë të Forumit Ndërkombëtar për Gratë, Paqen dhe Sigurinë, duke theksuar rolin jetik të grave dhe fëmijëve në ndërtimin dhe ruajtjen e paqes. Ajo e cilësoi këtë forum si një thirrje për veprim global në kohë pasigurie dhe krize, duke e vendosur Kosovën në qendër të një debati ndërkombëtar mbi drejtësinë, sigurinë dhe barazinë.
“Nuk ka asgjë më të vlefshme sesa të luftosh për paqe, pasi paqja është themeli i gjithçkaje për të cilën përpiqemi,” u shpreh Osmani. Ajo rikujtoi rrugëtimin e dhimbshëm të Kosovës dhe veçanërisht fuqinë e grave gjatë dhe pas luftës, duke theksuar se ato nuk pranuan të shiheshin vetëm si viktima, por si ndërtuese të lirisë, paqes dhe së ardhmes. “Në orët më të errëta, ishin gratë e këtij vendi ato që na mbajtën zemrat e thyera të bashkuara,” tha ajo, duke vënë në pah forcën shpirtërore dhe vendosmërinë e grave që i dhanë formë realitetit të sotëm të Kosovës.
Presidentja theksoi se paqja nuk është thjesht mungesa e dhunës apo pushimi i zjarrit, por një proces transformues, që kërkon guxim, përfshirje dhe drejtësi. “Është një thirrje për të ndërprerë ciklet e dhunës. Një thirrje për të ndërtuar një paqe që nuk është pasive, por dinamike, guximtare, përfaqësuese dhe e drejtë. Një paqe që e vendos sigurinë e fëmijëve në qendër të angazhimit tonë,” u shpreh ajo.
Mundesh me e lexu edhe…
Në forum mori pjesë edhe Guvernatori i Përgjithshëm i Antigua dhe Barbuda, Rodney Williams, i cili e vlerësoi Kosovën si një model frymëzues për shtetet e vogla në zhvillim. Ai theksoi se rruga e Kosovës nga lufta në stabilitet është një dëshmi e fuqishme e këmbënguljes, vizionit dhe udhëheqjes. Sipas tij, përpjekjet e Kosovës për të ndërtuar partneritete strategjike, për të forcuar sundimin e ligjit dhe për të promovuar paqen janë shembullore dhe duhet të frymëzojnë vendet që po përballen me sfida të ngjashme.
“Udhëtimi i kombit tuaj nga konflikti në vetëbesim është një dëshmi e fuqisë së këmbënguljes dhe qëllimit. Që takohemi në këtë tokë, dikur e shkatërruar nga lufta dhe sot në përpjekje për paqe, nuk i shpëton askujt prej nesh. Na kujton se paqja nuk është kurrë aksidentale. Ajo fitohet, mbrohet dhe mbahet në jetë përmes vizionit, përfshirjes dhe guximit,” deklaroi ai.
Williams vuri një paralele mes përvojave të Kosovës dhe atyre të Karaibeve, duke theksuar se gratë kanë qenë gjithmonë shtylla të qëndrueshmërisë në kohë krizash – qoftë përmes avokimit për arsim, qeverisjes gjithëpërfshirëse apo ruajtjes së strukturës familjare dhe shoqërore. Ai bëri thirrje për institucionalizimin e udhëheqjes së grave në të gjitha nivelet e sigurisë, investimin në shëndetin mendor dhe rikuperimin e traumave, përfshirjen e të mbijetuarve si partnerë realë në sistemin e drejtësisë dhe kapërcimin e ndarjes digjitale për të mbrojtur më të cenueshmit.
Ky forum, që përkon me 25-vjetorin e miratimit të Rezolutës 1325 të Këshillit të Sigurimit të OKB-së, i rikujton botës se roli i grave në paqe dhe siguri nuk është vetëm simbolik – është vendimtar./Katror.info
