Kosova ka pasur gjithmonë një lidhje të ngushtë me ish sekretaren amerikane të shtetit, Madeline Albright, e cila ndërroi jetë në prill të këtij viti. Për shkak të ndikimit të saj në ndaljen e luftës në Kosovë dhe shtyrjen përpara të intervenimit të NATO-s, Albright është çmuar tejmase në Kosovë, ndërsa shtatorja e saj është ngritur në njërën nga rrugët kryesore të Prishtinës.
Por, Kosova duket se lidhjet me familjen Albright nuk do ta shkëpusë akoma. Është bija e saj Alice Albright, ajo që qëndroi sot në Kosovë dhe përuroi investimet e bëra nga Korporata e Sfidave të Mijëvjeçarit (MCC) në krye të së cilës është që nga vitti 2021.
Ajo në mëngjes ishte pjesë e përurimit të tri ndërtesave të renovuara në lagjen “Ulpiana” në Prishtinë.
Mundesh me e lexu edhe...
“Që nga viti 2004 MCC në bashkëpunim me 40 shtetet e botës i kanë ndihmuar gjithandej në botë për të shtyrë përpara rritjen ekonomike dhe zvogëlimin e varfërisë… MCC me Kosovën ka bashkëpunuar që nga viti 2017 kur kemi bërë nënshkrimin e marrëveshjeve, me Kosovën kemi punuar bashkërisht në furnizim në energji elektrike, në sundim të ligjit etj”, tha ndër të tjera Albright, e cila nesër do të jetë e pranishme në një konferencë së bashku me Presidenten e Kosovës, Vjosa Osmani.
Po, kush është Alice Albright?
Alice Albright është kryeshefe ekzekutive e Korporatës së Sfidës së Mijëvjeçarit (MCC). Aty ajo ofron udhëheqje strategjike dhe vizion për agjencinë duke ndihmuar në arritjen e prioriteteve programore.
Albright ka më shumë se 30 vjet përvojë ndërkombëtare në sektorin privat, jofitimprurës dhe publik.
Ajo ka qenë kryeshefe ekzekutive e Sekretariatit të Partneritetit Global për Arsimin dhe shërbeu në administratën e Obamës nga 2009 – 2013 si zëvendës presidente ekzekutive dhe kryeshefe operative e Bankës së Eksport-Importit të Shteteve të Bashkuara (EXIM).
Përpara EXIM, Albright mbante role drejtuese në Aleancën Globale për Vaksinat dhe Imunizimet (GAVI) dhe punoi si bankiere me fokus në tregjet në zhvillim.
Përgatiti:
