Të dielën në mbrëmje, skena gjigante në Sheshin Skënderbeu në kryeqytet ishte vendtakimi i yjeve të njohur të operës. Gala mbrëmja ‘Ramë Lahaj & Friends’ ishte një udhëtim magjik muzikor.
Programi qendror i këtij edicioni të Rame Lahaj International Opera Festival bëri bashkë dirigjentin Pier Giorgio Morandi, shoqëruar nga Filharmonia e Kosovës, Ramë Lahaj – tenor, Yulia Suleimanova – soprano, Alessandro Safina – tenor dhe Massimo Cavalletti – bariton.
Ky ka qenë koncerti i parë i edicionit të tretë të festivalit ndërkombëtar të operës “Ramë Lahaj”.
Mundesh me e lexu edhe…
Filharmonia e Kosovës ka hapur koncertin me prelud nga “Carmeni” i G. Bizet. Pas saj Lahaj është shfaqur në skenë për të përshëndetur publikun.
“Mirëmbrëma Prishtinë, mirëmbrëma miq e dashamirë të artit. Kjo ishte Filharmonia e Kosovës që na ka besuar që nga viti 2019. Faleminderit Filharmonia e Kosovës!”, ka thënë Lahaj. Ka falënderuar institucionet dhe publikun për përkrahjen për të vazhduar me “La tebernera del Puerto” të Sorozbalit, interpretuar nga vetë tenori që e organizon festivalin, e që tash e tre vjet i sjell kryeqytetit magjinë e skenave botërore.
Orkestra është dirigjuar nga maestroja italian Pier Giorgio Morandi.
Para nisjes së koncertit është parë rend i gjatë në hyrje.
“Koncerti ka një kosto biletash pasi të gjitha mjetet shkojnë për fondacionin që përkrah artistët e rinj”, ka shpjeguar Lahaj.
“Opera për liri”, është motoja e edicionit të sivjetmë të “Ramë Lahaj International Opera Festival” që vjen me pesë koncerte. Gala-mbrëmja ka qenë vetëm fillimi.
Pjesa qendrore e koncertit ka pasur kryefjalë pjesë kryeveprash. Fill pas Lahajt, në skenë janë ngjitur edhe dy solistët e tjerë të mbrëmjes. Baritoni Massimo Cavalletti ka interpretuar arien “Argo al factotum” nga “Berberi i Sevljës” të Rossinit e sopranoja Yulia Suleimanova ka sjellë “Il Bacio” të Luigi Arditit. Treshja ka sjellë edhe të tjera vepra.
Krahas veprave botërore, në repertor ka qenë edhe muzika shqipe. Ka qenë një kolazh me “Kroi i fshatit tonë”, “Po ti ç’a i ke thanë dikuje” (në video) e “M’ka shku menia me u feju”, të cilat i ka sjellë mjeshtërisht tenori Lahaj, pas pjesëve të Rossinit, Puccinit e Verdit nga ai, Suleimanova e Cavalletti./Katror.info
Përgatiti:
