Mediat më të mëdha botërore janë bashkuar për të përforcuar zërin e shumicës së heshtur që kërkon veprim për klimën.
Pavarësisht perceptimit se kujdesi për ndryshimet klimatike është çështje e ndarë dhe polemike, hulumtimet tregojnë se 89% e njerëzve në botë duan që qeveritë të ndërmarrin masa më të forta për klimën. Megjithatë, shumë mendojnë gabimisht se janë në pakicë – një fenomen që psikologët e quajnë “padije pluraliste”.
Për ta sfiduar këtë mit, nisma globale “The 89 Percent Project” është lançuar nga organizata Covering Climate Now, duke bashkuar media prestigjioze si The Guardian, Time, Reuters dhe Al Jazeera.
Mundesh me e lexu edhe...
Sipas Mark Hertsgaard, bashkëthemelues i nismës, kjo fushatë mediatike jo vetëm që sjell një narrativë të re për klimën, por edhe i tregon publikut një të vërtetë të rëndësishme që shpesh anashkalohet: mbështetja për veprim klimatik është masive dhe globale, shkruan PositiveNews, përcjell Katror.info.
Një studim i fundit me 130 mijë persona nga 125 shtete tregon se mbi dy të tretat janë të gatshëm të dhurojnë 1% të të ardhurave për çështje klimatike – një tjetër dëshmi e angazhimit të gjerë që shpesh nuk reflektohet në diskursin publik.
Qëllimi i projektit është të fuqizojë publikun dhe të inkurajojë veprimin kolektiv, përmes informimit dhe përhapjes së lajmeve pozitive e mobilizuese deri në Samitin e COP30 dhe më tej.
Sipas Hertsgaard, një nga gjërat më të dobishme që mund të bëjnë individët është të ndajnë këto histori me të tjerët, përfshirë udhëheqësit politikë – shumë prej të cilëve nuk janë të vetëdijshëm për përkrahjen e gjerë që ka veprimi klimatik në shoqëri./Katror.info
