Në pemishten prej rreth 7 hektarësh, në të cilën ka të mbjellë pothuajse të gjitha llojet e pemëve, pemëtari Xhavit Alija nga Hereçi i Gjakovës, këto ditë po e vjelë aroninë, prodhim mjaft i kërkuar kohët e fundit. Gjatë kësaj periudhe, thotë Xhaviti, ka të angazhuar rreth 20 punëtorë sezonalë.
“Kemi filluar vjeljen e aronisë. Aronia, manaferrat, bojlijat, kumbullat, siç e dimë, janë bimë të cilat bien një profit dmth 1 kg aroni, 1 kg mjedër, 1 kg manaferrë dhe 1 kg që vilet, paguhet 50 cent për kilogram. Kam punëtorë që kanë vjelë gjatë ditës 360 kg dmth iu ka kushtu dita 180 euro, prandaj dyert e plantacionit janë të hapura për të gjithë ata që e donë punën. Kështu që kam 20-30 punëtorë sezonal tash në vjelje, por edhe kam edhe gjatë mihjes dhe largimit të barojave”, tha Alija.
“Puna e bujqësisë është një punë që do përkushtim, do mund, do sakrificë, mirëpo puna me Xhavitin është shumë e mirë, kalojmë mirë, marrëdhëniet i kemi shumë të mira, jo si shef- punëtor, por jemi pothuaj një familje. Për kushte nuk ka asnjë vërejtje. Me paga, me punë e me tana, mirë i kemi”, tha Bujar Dula, punëtor.
Mundesh me e lexu edhe...
Për punën e vyer të pemëtarit Alija, sidomos në krijimin e mundësive për punëtorët sezonalë, flasin edhe zyrtarët nga komuna e Gjakovës.
“Jemi në plantacionin e Xhavit Alisë ku kemi edhe aroni, edhe rrushin edhe manaferrën , edhe mjedrat. Njerëzit me këtë vullnet të punës si Xhaviti i duhet komunës sonë me pas sa më shumë. Tashmë fermerët kanë kaluar në mbjelljen e produkteve që janë profitabile për ne si konsumatorë të këtyre produkteve kështu që ne si komunë mundohemi që me ndonjë mekanizëm të jemi pranë tyre që t’ua lehtësojmë sadopak mundin e tyre”, tha Gani Hajdari, drejtor i DBZHR.
Si rezultat i prodhimeve cilësore të viteve të fundit, pemëtari Alija tashmë është licencuar nga institucionet shtetërore edhe për përpunimin e lëngut të aronisë, prodhim po ashtu mjaft i kërkuar në tregun vendor./RTK/Katror.info
