Avokati i Popullit ka publikuar një letër rekomandimi drejtuar Ministrisë së Financave, Punës dhe Transfereve (MFPT), pas përfundimit të hetimeve të nisura sipas detyrës zyrtare.
Sipas një postimi në rrjetin social në Facebook bëhet e ditur se hetimet u inicuan pas pranimit të një numri të madh ankesash, kryesisht nga komuniteti serb, në lidhje me pezullimin e pagesës së shtesës për fëmijë.
Sipas ankesave, përfituesit kishin pranuar shtesat për fëmijë nga shtatori 2021 deri në dhjetor 2024. Megjithatë, në periudhën gusht–dhjetor 2024, Departamenti i Skemave Sociale (DSS) i MFPT-së kishte kërkuar verifikimin e dokumenteve, një hap që u ndoq nga përfituesit nëpërmjet qendrave për punë sociale dhe postës.
Mundesh me e lexu edhe...
“Ankuesit kishin vepruar sipas udhëzimeve të DSS-së duke i dorëzuar dokumentet përmes qendrave për punë sociale, e më pas edhe përmes postës. Përkundër këtyre veprimeve, pagesa e shtesës për fëmijë vazhdonte të mbetej e pezulluar, duke mos pranuar njoftime apo shpjegime lidhur me çështjen. Disa përfituesve të komunitetit serb u është kërkuar që të paraqiten në Agjencinë e Statistikave të Kosovës për ta verifikuar statusin e tyre të vendbanimit. Kjo është bërë për shkak se dëshmitë e tyre të ofruara, siç janë vërtetimet nga shkollat që ndjekin fëmijët dhe të dhënat e vaksinimit, nuk njihen nga sistemi shtetëror”, thuhet në njoftim.
Tutje në njoftim bëhet e ditur se gjatë hetimit të rastit, Avokati i Popullit ka kërkuar nga zyrtarët e DSS-së që t’u ofroheshin të gjitha kopjet e vendimeve dhe të udhëzimeve mbi të cilën bazohej puna e këtij departamenti, por deri në përpilimin e këtij raporti siç thuhet në njoftim Avokati i Popullit nuk i ka pranuar këto dokumente.
“Dokumentet e tilla, siç është Vendimi i 31 tetorit 2024, që parasheh një proces të verifikimit të dokumenteve, por nuk përcaktohen dokumentet shtesë, të cilat u janë kërkuar qytetarëve përmes e-mailit, dhe dokumentet tjera, nuk gjendeshin të publikuara. Avokati i Popullit ka konstatuar se veprimet e MFPT-së kanë mundur të mos kenë për qëllim shkeljen e të drejtave të qytetarëve por i gjithë procesi i verifikimit në rend të parë ka qenë në kundërshtim me parimet e procedurës administrative. Dhe kjo ka pasur një efekt zingjiror në shkeljen e parimeve të sundimit të ligjit, në veçanti të fëmijëve të komunitetit serb, duke i vënë ata në një pozitë të pabarabartë dhe të pafavorshme, që në fakt përbën diskriminim mbi bazën e përkatësisë etnike”, thuhet tutje në njoftim.
Në këtë letër, Avokati i Popullit i ka rekomanduar MFPT-së që pa vonesa të mëtejshme, të gjitha vendimet, udhëzimet dhe kushtet në lidhje me procesin e verifikimit të dokumentacionit të qytetarëve përfitues të shtesës për fëmijë të publikohen në mënyrë të qartë dhe transparente, në të dyja gjuhët zyrtare.
Rekomandimi tjetër ka të bëjë me gjetjen e modaliteteve të përshtatshme për verifikimin e përmbushjes së kritereve.
Avokati i Popullit po ashtu rekomandon që çdo përfituesi, të cilit i është pezulluar pagesa e shtesës për fëmijë, pas verifikimit, t’i paguhen në mënyrë retroaktive të gjitha pagesat që kanë mbetur të papaguara. /Telegrafi/Katror.info
