Marrja e probiotikëve mund të reduktojë ndjenjat negative, duke shtuar prova të reja mbi rolin e lidhjes zorrë-tru në rregullimin e emocioneve sipas një studimi të ri.
Në këtë studim me placebo, studiuesit vëzhguan se pjesëmarrësit filluan të ndienin përmirësim të humorit brenda dy javësh nga fillimi i marrjes së probiotikëve, raporton Healthline.
Pasi studimi u zhvillua tek të rritur të shëndetshëm dhe jo vetëm tek persona me depresion të diagnostikuar, gjetjet sugjerojnë se probiotikët mund të kenë përfitime për shëndetin mendor edhe në popullatën e gjerë.
Mundesh me e lexu edhe...
Sipas studiuesve, përdorimi i monitorimit të përditshëm mundësoi kapjen e përmirësimeve të vogla që shpesh nuk zbulohen nga testet e zakonshme psikologjike.
“Kjo është hera e parë që një studim përdor monitorimin ditor të humorit për të vlerësuar efektin e probiotikëve. Madje, në fund të muajit të trajtimit, gjendja negative e pjesëmarrësve vazhdonte të përmirësohej”, tha Katerina Johnson, autore e studimit dhe hulumtuese në Universitetin e Oksfordit.
Zorra prodhon rreth 95% të serotoninës – një neurotransmetues që ndikon në gjithçka, nga humori deri te oreksi, dhe kjo tregon se përmirësimi i shëndetit të zorrës mund të ketë ndikim pozitiv në shëndetin mendor.
Probiotikët reduktuan ndjenjat negative
Studiuesit përfshinë 88 vullnetarë të shëndetshëm me moshë mesatare 22 vjeç. Pjesëmarrësit nuk ishin mbi peshë dhe nuk konsumonin alkool apo drogë në mënyrë të tepruar.
Ata u ndanë në mënyrë të rastësishme për të marrë ose një përzierje probiotike me shumë lloje bakteresh, ose një placebo për 28 ditë. Probiotikët përmbanin nëntë lloje bakteresh të ndryshme, përfshirë disa lloje të Bifidobacterium, Lactobacillus dhe Lactococcus. Pjesëmarrësit merrnin çdo ditë dy gram të tretur në ujë të vakët.
Pjesëmarrësit që morën probiotikë raportuan një reduktim të ndjeshëm të gjendjes negative që nga java e dytë, ndryshe nga grupi me placebo që nuk tregoi përmirësim.
“Pyetësorët tradicionalë përpiqen të ndajnë ndjenjat në kategori si stres, zemërim, apo ankth, ndërsa një pyetje më e përgjithshme për ndjesinë pozitive apo negative të ditës mund të kapë më mirë ndryshimet emocionale”, tha Johnson.
Sipas ekspertëve, një nga avantazhet më të rëndësishme të këtyre gjetjeve është fakti se probiotikët reduktuan ndjeshmërinë negative pa ndikuar në emocionet pozitive. Kjo është ndryshe nga disa ilaçe antidepresive që mund të shkaktojnë “mpirje emocionale”.
“Shumë pacientë raportojnë se medikamentet antidepresive i bëjnë të ndihen emocionalisht të sheshtë. Kjo nuk ndodhi me probiotikët, gjë që është shumë interesante”, tha Lisa Durette, drejtuese e psikiatrisë në Universitetin e Nevadës.
Gjithashtu, individët me prirje më të lartë për shmangie të rrezikut përjetuan përmirësim më të madh në gjendjen e tyre kur morën probiotikë, raport Healthline.
Probiotikët nuk zëvendësojnë trajtimin profesional
Pavarësisht rezultateve premtuese, ekspertët theksojnë se probiotikët nuk duhet të zëvendësojnë trajtimin mjekësor për problemet e shëndetit mendor.
“Probiotikët nuk janë një zgjidhje e mjaftueshme për parandalimin apo trajtimin e sëmundjeve mendore, ato janë suplemente ushqimore që nuk i nënshtrohen të njëjtave standarde si ilaçet e miratuara nga FDA”, tha Christoph Thaiss nga Universiteti i Stanfordit.
Durette shpjegoi se praktikat si dieta, aktiviteti fizik dhe suplementet probiotike mund të kenë një rol ndihmës në trajtimin e shëndetit mendor, për sa kohë që përdoruesit janë të informuar për rreziqet dhe përfitimet.
Por, megjithatë, ende nuk ka mjaftueshëm të dhëna për të përcaktuar nëse këto ndërhyrje mund të zëvendësojnë trajtimin tradicional./AP/Katror.info
Përgatiti:
