Restoranti lundrues në Norvegji bëhet viral në internet

Në pjesën perëndimore të Norvegjisë, në fjordin Hardanger, ndodhet një restorant, i quajtur Iris, i cili është bërë një hit i vërtetë në internet.

Për shkak se është i pazakonshëm dhe vendndodhjes së tij lundruese, ky restorant është bërë viral në Tiktok. Ai shoqërohet me një koncept unik të ngrënies dhe është gjithashtu interesant fakti se vetëm 24 persona mund të jenë në të njëjtën kohë në darkë, e cila zgjat gjashtë orë, shkruan Katror.info.

Është e rëndësishme të shtohet se të gjitha vendet në restorant janë tashmë të rezervuara deri në tetor.

Sipas informacioneve në faqen e restorantit, gjithçka fillon me një shëtitje me varkë nga qyteti i afërt i Rosendal, me një ndalesë dhe mirëseardhje në formën e ushqimeve të vogla të kuzhinieres Anika Madsen në ishullin Snilstveitoi.

Më pas, të ftuarit mbërrijnë në instalacionin lundrues të artit të quajtur Syri i Salmonit, ku mbrëmja fillon me një përvojë nënujore shumëshqisore. Vizitorët më pas vazhdojnë dhe marrin një meny të degustimit, shoqëruar me një pamje mbresëlënëse të fjordit dhe vargmaleve malore aty pranë.

Menyja e plotë e restorantit nuk dihet ende, por ajo që dimë është se për gjashtë orë, të ftuarit mund të presin shijet e ambientit ku ndodhen, me theks në produktet vendase dhe të qëndrueshme. Menyja u krijua për të treguar historinë e sfidave dhe kërcënimeve për sistemin global të ushqimit, por edhe për të paraqitur ide të reja për të ardhmen e gastronomisë së lartë.

Për këtë darkë unike, mysafirët do të duhet të shpenzojnë 3200 NOK, që është afërsisht 399 €, me opsionin për pagesë shtesë për verë prej 2500 NOK (afërsisht 267 €) ose pije joalkoolike për 1500 NOK (afërsisht 160 €).

Por kujdes për ata me nevoja të veçanta dietike, për shkak të natyrës sezonale dhe lokale të pjatave, veganët, vegjetarianët dhe ata me kufizime të caktuara dietike nuk do të shërbehen.

Pas këtij projekti unik qëndron kuzhinierja e re daneze Anika Madsen, e cila u zhvendos në ishullin Snilstveitoj, jo shumë larg instalacionit të artit lundrues, për t’u integruar plotësisht me mjedisin nordik, ku gjen përbërësit për pjatat e saj në ujërat dhe malet e afërta.

Salmon Eye, shtëpia lundruese e restorantit Iris, është instalimi më i madh i artit lundrues në botë dhe u financua nga Eide Fjordbruk, një fermë e qëndrueshme salmonësh. Ky instalim çeliku, i cili është mbi 14 metra i lartë dhe përfshin katër nivele (sipër dhe nën ujë), është vepër e studios arkitekturore Kvorning Design. /Katror.info