Në prag të fillimit të turneut Wimbledon, vjen një lajm i habitshëm nga bota e sportit: Roger Federer, legjenda zvicerane e tenisit dhe mbajtësi i rekordit për tituj në Londër, është bërë zyrtarisht miliarder.
Sipas Indeksit të Miliarderëve të Bloomberg, pasuria neto e Federer, 43 vjeç, vlerësohet tani në 1.2 miliardë euro.
Jashtë fushës, por në kulmin e suksesit
Tre vjet pas tërheqjes nga sporti profesionist, Federer e ka kaluar pragun simbolik të një miliardi eurove – ndonëse vetëm një pjesë e vogël e pasurisë së tij buron nga fitimet në fushë, rreth 120 milionë euro nga çmimet në turne. Pjesa më e madhe ka ardhur nga sponsorizimet, investimet strategjike dhe bashkëpunimet afatgjata me markat ndërkombëtare.
Mundesh me e lexu edhe...
Gjatë dhe pas karrierës, Federer ka qenë fytyra e kompanive si Rolex, Lindt & Sprüngli, dhe Credit Suisse (tani UBS). Në vitin 2018, ai nënshkroi një kontratë dhjetëvjeçare me markën japoneze Uniqlo, me vlerë afro 275 milionë euro – një marrëveshje që e ndihmoi të rrisë ndjeshëm të ardhurat jashtë fushës.
Një tjetër sukses financiar për tenistin zviceran është aksioni në kompaninë e këpucëve sportive “On”, i cili vlerësohet të jetë rreth 460 milionë euro.
I pari jo-amerikan me këtë status
Me këtë arritje, Federer bëhet atleti i parë jo-amerikan që arrin statusin e miliarderit dhe një nga sportistët më të pasur në histori.
Në krye të listës globale mbetet Michael Jordan, me një pasuri prej 3.25 miliardë euro, të fituar kryesisht pas shitjes së aksioneve në klubin Charlotte Hornets. Pas tij renditen LeBron James me 1.4 miliardë euro dhe Tiger Woods me 1.3 miliardë euro.
Nga fushat e tenisit te bota e biznesit, Roger Federer vazhdon të jetë një simbol i klasit, që triumfon edhe jashtë sportit. /Katror.info
Përgatiti:
