Aktorja e mirënjohur kosovare, Safete Rogova, është nderuar me çmimin e karrierës në edicionin e 13-të të Festivalit për Art dhe Trashëgimi Kulturore, EtnoFest në fshatin Kukaj.
“Çmimi I karrierës i jepet Safete Rogovës, për kontributin shumëvjeçar në fushën e artit dramatik të cilin jo rrallë e ngre deri në angazhim shoqëror,” ka njoftuar Etno Fest në një postim në Facebook.
E njohur për kujdesin dhe elegancën klasike, Safete Rogova është grua që ka luftuar të gjitha paragjykimet në jetën e saj, duke u fokusuar përherë në aftësitë profesionale. Ndonëse u pensionua në vitin 2011, ajo hyri në historinë e artit kosovar, la gjurmë të pashlyeshme përmes 100 roleve të interpretuara, u shqua si një perfeksioniste në zanatin e saj, duke bërë që kontributi i saj të jetë i pamohueshëm!
Në 2013, ajo u dekorua me Medaljen Presidenciale të Meritave për karrierën e saj në teatër, dhe fushatën kundër analfabetizmit dhe për fuqizimin e grave përmes Shoqatës Motrat Qiriazi, të cilën e bashkëthemeloi me motrën e saj Igballe Rogova dhe bashkëshortin e ndjerë, kostumografin dhe skenografin, Nuredin Loxha.
E njohur për epitetin artistik, aktorja Safete Rogova gjatë karrierës së saj ka realizuar një gamë të konsiderueshme rolesh. Që nga debutimi, në moshë të fëmijërisë, në shfaqjen ‘Pipi i argjendtë’ në Teatrin e Fëmijëve, në Prishtinë, përherë la përshtypje dhe mori duartrokitjet e audiencës e vlerësimet më të mira të kritikëve. Është aktore e cila në mënyrë bindëse dhe të dinjitetshme i përjeton rolet në të cilat angazhohet. /Katror.info