Shkencëtarët po punojnë për të mbrojtur pinguinët e Antarktikut

Natacha Planque po punon për të kuptuar se si kriza klimatike po ndikon tek pinguinët perandorakë dhe ata Adélie në Antarktik.

Tundrat e Antarktikut janë habitat i një sërë speciesh që janë përshtatur në mënyra mahnitëse me kushtet e ngrira. Por, kriza klimatike po i vë në rrezik mijëra pinguinë, ndërsa përpjekjet për t’i mbrojtur janë tashmë në zhvillim.

Asistentja e punës në terren, Natacha Planque, punon çdo ditë në kushte të vështira, me temperatura deri në -50°C dhe erëra që kalojnë 100 km/orë, duke studiuar jetën e pinguinëve perandorakë dhe Adélie në arkipelagun Pointe Géologie, shkruan Positive News, transmeton Katror.info.

Nga Stacioni Dumont d’Urville (DDU), Planque dhe ekipi i saj monitorojnë 25 ishuj me helikopter dhe në këmbë, duke kryer numërime vjetore të të dyja specieve të pinguinëve. Ata bashkëpunojnë me Qendrën për Studime Biologjike të Chizé dhe Institutin Polar Francez, duke marrë mbështetje nga WWF.

Planque shpjegoi se në vitin 2024 ata numëruan 38,000 çifte të pinguinëve Adélie dhe 34,000 të vegjël. Numrat kanë qenë në rritje në Pointe Géologie që nga viti 1985.

Megjithatë, të dhënat nga WWF tregojnë se ndikimet e ndryshimeve klimatike kanë shkaktuar një rënie prej 65% të popullatës së pinguinëve Adélie në Gadishullin Antarktik gjatë 25 viteve të fundit.

Humbja e akullit ka shkaktuar ulje të sasisë së ‘krill-it’, burimi kryesor i ushqimit të pinguinëve, ndërsa temperaturat më të ngrohta mendohet se ndikojnë në kohën e çeljes së vezëve. Në vitet e fundit, ka pasur dështime masive në shumimin e pinguinëve perandorakë.

“Të dhënat janë alarmante, dhe popullatat e pinguinëve perandorakë janë në rënie, por shikimi i këtyre shpendëve ikonë duke marshuar nëpër shkretëtirë më mbush me habi,” thotë Planque.

Monitorimi i suksesit riprodhues të pinguinëve përfshin mbledhjen dhe numërimin e vezëve të pinguinëve perandorakë që nuk kanë arritur të çelin; në vitin 2024 ajo mblodhi 100 të tilla dhe, duke matur gjatësinë, gjerësinë dhe masën e secilës vezë, studioi efektet e kushteve mjedisore. /Katror.info