Një studim i ri ka zbuluar se futja e Londrës në Zonën me Emetim Ultra të Ulët (Ultra Low Emission Zone – ULEZ) ka rritur ndjeshëm numrin e fëmijëve që ecin dhe çiklojnë për në shkollë. Ky rezultat thekson ndikimin pozitiv të politikave mjedisore në shëndetin publik.
Studimi, i kryer nga Universiteti i Cambridge dhe Universiteti Queen Mary, ka ndjekur zakonët e udhëtimit të 2,000 fëmijëve gjatë dy viteve të fundit. Rezultatet tregojnë se 40% e fëmijëve që më parë dërgoheshin në shkollë me makinë tani preferojnë të ecin, të çiklojnë ose të përdorin transportin publik që kur u zbatua ULEZ.
Në krahasim, vetëm 20% e fëmijëve në Luton, ku nuk ka ULEZ, kanë bërë një ndryshim të ngjashëm gjatë të njëjtës periudhë.
Mundesh me e lexu edhe…
Prof. Chris Griffiths nga Universiteti Queen Mary komentoi rezultatet, duke thënë: “Ky është një dëshmi se programet për zonat me ajër të pastër, të cilat synojnë reduktimin e ndotjes së ajrit, kanë potencialin për të përmirësuar gjithashtu shëndetin publik në përgjithësi,” shkruan PositiveNews, përcjell Katror.
ULEZ-i, i prezantuar në vitin 2019 dhe i zgjeruar në periferitë e Londrës vitin e kaluar, kërkon që shoferët e mjeteve të vjetra dhe më ndotëse të paguajnë £12.50 për të hyrë në zonë. Iniciativa përfshin gjithashtu një skemë shpërbërjeje që inkurajon shoferët të zëvendësojnë makinat e papërshtatshme me alternativa më të pastra.
Rezultatet e studimit demonstrojnë se politikat mjedisore mund të kenë përfitime më të gjera, duke përfshirë nxitjen e mënyrave më të shëndetshme të jetesës ndër fëmijë. Rritja e përdorimit të opsioneve të transportit aktiv si ecja dhe çiklizmi ndihmon jo vetëm në reduktimin e ndotjes, por gjithashtu adreson sfidat e shëndetit publik që lidhen me sjelljet sedentare./Katror.info
