Evropa nuk është e panjohur për turistët. Vende si Franca, Spanja dhe Italia shpesh kryesojnë listën e destinacioneve më të njohura në botë. Turqia gjithashtu është pozicionuar si një nga vendet më të njohura në mesin e turistëve. Megjithatë, ka vende të tjera që duhen vizituar, e që nuk janë në listat e turistëve.
Turistët rrallë vendosin të udhëtojnë në vende më pak turistike evropiane. Ndonjëherë është e nevojshme të devijoni nga shtigjet e rrahura turistike dhe të kërkoni diçka tjetër, më pak të njohur, por po aq të bukur dhe përrallore. Kompania mediatike Euronews ka bërë një listë me vendet më pak të njohura, destinacione të lënë pas dore që duhet të vizitoni në udhëtimin tuaj të radhës.
Rumania – ajo ndjenjë e mrekullueshme përrallore
Mundesh me e lexu edhe...
Rumania është më e famshme për lidhjen e saj me Drakulën. Është një vend me majat e thepisura malore, kështjellat e larta dhe qytetet mesjetare që i kanë rezistuar kohës që nga periudhat e lashta.
Ky vend është i njohur për njerëzit e tij magjepsës dhe fshatrat që shfaqin kulturën tradicionale të vendit. Përveç kësaj, ka shumë përmbajtje kulturore dhe historike, si dhe bukuri natyrore që mund të kënaqin të gjitha shijet dhe nevojat turistike. Kryeqyteti Bukureshti ka një stil unik arkitekturor që ndërthur arkitekturën klasike të shekullit të 19-të me arkitekturën e stilit brutalist sovjetik.
Lihtenshtajni – eksplorim paqësor i maleve
Ky vend i vogël ndodhet në malet midis Zvicrës dhe Austrisë. Edhe pse është një vend i vogël dhe nuk ka aeroportin e tij, është lehtësisht i qasshëm përmes infrastrukturës rrugore dhe hekurudhore. Lihtenshtajni është vendi më pak i vizituar në Evropë, që është një padrejtësi e madhe.
Lihtenshtajni ndodhet pranë Alpeve, kështu që turizmi dimëror është një degë jashtëzakonisht e rëndësishme ekonomike. Përveç skijimit, ka shumë shtigje ecjeje dhe biçikletash për të eksploruar vendin pa turmat e zakonshme turistike. Ka gjithashtu shumë pamje kulturore dhe qytete të bukura në Lihtenshtajn. Kjo tokë përrallore është aq e vogël sa mund të vizitohet për dy ditë.
Finlanda – Natyrë e paprekur
Me shumë më pak turistë se Norvegjia dhe Suedia fqinje, Finlanda ofron mundësinë e përsosur për të humbur në pyjet e larta dhe liqenet e pastër kristal të parqeve kombëtare idilike të vendit. Aty mund të takoni një shumëllojshmëri të gjerë kafshësh dhe të shijoni aurora borealis gjatë natës.
Krahas natyrës duhen veçuar edhe qytetet moderne dhe fshatrat tradicionale. Finlanda është e njohur për njerëzit më të lumtur në botë, të cilët mund t’i ndjeni kur vizitoni.
Luksemburgu – një peisazh unik
Luksemburgu është pa dalje në det dhe shpesh anashkalohet në favor të fqinjëve të tij më të njohur Francës dhe Gjermanisë. Megjithatë, kryeqyteti i tij përrallor, kështjellat mesjetare dhe fshatrat piktoreske e bëjnë atë një vend që ia vlen të vizitohet.
Edhe pse është një vend i vogël, Luksemburgu ka shumë natyrë për të eksploruar. Ka shtigje çiklizmi dhe ecjeje të mirëmbajtura që kalojnë mbi kodra dhe lugina të pyllëzuara të rrethuara nga vreshta. Luksemburgu është një nga vendet më të vogla në Evropë dhe cilësia e jetës që ekziston atje rrallë shihet dhe përjetohet diku tjetër./Katror.info
Përgatiti:
