Për disa arritja e sukseseve ka qenë e lehtë, ndërkaq për disa të tjerë, marrja e vendimit për t’u larguar nga vendlindja, integrimi në një mjedis tjetër, përshtatja dhe arritja e sukseseve, nuk kanë ardhur lehtë, pasi që iu është dashur ta trasojnë vetë rrugën e tyre.
E rast i ngjashëm është edhe Ramë Hajraj nga Istogu, i cili mori vendimin për t’u larguar drejt Gjermanisë dhe të gjitha barrierat e të qenit një i huaj, në një vend të huaj, iu desh t’i kalonte vetëm.
Sot ai ushtron profesionin si Data Scientist dhe Data Analyst, si dhe Hulumtues Quantitativ, Ligjërues dhe Konsulent.
Mundesh me e lexu edhe...
Duke qenë i vetëdijëshëm për të gjitha pengesat që studentët e rinj nga Kosova mund t’i hasin, ai ka vendosur që t’u ofrojë konsulecë falas atyre që janë me kushte më të dobëta ekonomike, dhe nuk kanë mundësi të paguajnë.
“Sot dua të ndaj me ju diçka shumë personale dhe të rëndësishme për mua. Kam vendosur të ofroj shërbimet e mia të konsulencës falas për të gjithë ata studentë që janë në situata të vështira ekonomike dhe nuk kanë mundësi të paguajnë. E di mirë se çfarë do të thotë të përballesh me sfidat e jetës kur të mungojnë burimet e nevojshme financiare, sepse edhe unë vetë kam qenë në atë situatë. Kam kaluar periudha kur isha në asistencë sociale dhe ndjeja peshën e rëndë të asaj situate, ku çdo ditë ishte një luftë e vogël për të ecur përpara. E di sa ndihmon një dorë e shtrirë kur je i zhytur në vështirësi dhe si një veprim i vogël i mirësisë mund të ndryshojë shumë në jetën e dikujt,” njoftoi Hajraj në rrjetin e tij social, Facebook.
Gjithashtu ai bashkëndien me të gjithë ata studentë që iu duhet të ballafaqohen me kushtet e rënda ekonomike që edhe ai vetë i përjetoi, krejt kjo për t’i arritur qëllimet e tij në jetë.
“Kur isha në atë pozitë, m’u desh të luftoja jo vetëm me vështirësitë financiare, por edhe me ndjenjën e pafuqisë dhe mungesës së shpresës. Prandaj, dua që asnjë student të mos ndjejë se është vetëm në këtë udhëtim. Nëse jeni një rast social, një familje e kategorive të luftës, ose dikush që ndodhet në një situatë të vështirë, dua të jem pranë jush. Dua t’ju ndihmoj të arrini qëllimet tuaja, pavarësisht pengesave që mund të keni përballë.
Jam këtu për t’ju ofruar shërbimet e mia pro bono (pa pagesë) për të gjithë ata që mund të dëshmojnë nevojën e tyre. Kjo përfshin studentët që janë pjesë e kategorive të luftës, familjet që ndodhen në kushte të rënda ekonomike, dhe të gjithë ata që po luftojnë për një të ardhme më të mirë. E di se sa shumë mund të ndihmojë një shërbim i tillë kur ke nevojë më shumë se kurrë për mbështetje, dhe kjo është arsyeja pse dua t’ju jap këtë mundësi”, thuhet tutje në njoftim.
Të gjithë ata që duan t’i marrin shërbimet e Hajras, mjafton ta kontaktoni në platformat e tij sociale, dhe do ta gjeni mbështetjen e tij.
“Nuk është turp të kërkosh ndihmë; është një shenjë force dhe guximi. Ju siguroj se çdo kërkesë do të trajtohet me respektin dhe ndjeshmërinë që meritoni. Dua të jem ai zëri i vogël që ju thotë se nuk jeni vetëm, dhe se është dikush këtu që kupton atë që po kaloni dhe është i gatshëm të ndihmojë. Nëse jeni në këtë situatë, ju lutem, mos hezitoni të më kontaktoni. Jam këtu për ju, i gatshëm të ofroj mbështetjen time për t’ju ndihmuar të merrni hapat e nevojshëm drejt suksesit tuaj akademik dhe profesional”, thuhet në përfundim të postimit.
Ramë Hajraj ka lindur më 1994 në Istog të Kosovës dhe është ekspert dhe akademik i administrimit të biznesit. Studimet universitare dhe pasuniversitare i ka kryer në Universitetin e Pejës, “Haxhi Zeka”, për Administrim Biznesi.
Mban sfond të larmishëm profesional që përfshin role në organizatat rinore, gazetarinë dhe organizatat joqeveritare. Që nga viti 2019, Hajraj ka shërbyer si Drejtor Ekzekutiv i Institutit të Prishtinës për Studime Ekonomike Ndërkombëtare dhe gjithashtu mban role udhëheqëse në institucione të ndryshme, duke përfshirë Akademinë Statistikore dhe Akademinë e Edukimit Digjital.
Fushat e tij të ekspertizës përfshijnë makroekonominë, statistikat e aplikuara dhe sistemet e qëndrueshme ekonomike. Hajraj ka kontribuar në konferenca të shumta ndërkombëtare dhe është specializuar në teknikat e mësimdhënies digjitale. Ai është gjithashtu trajner i certifikuar në disa programe softuerike statistikore dhe të biznesit/Katror.info
Përgatiti:
