Sipas një hulumtimi të publikuar dje, në European Heart Journal, njerëzit që pinë kafe në mëngjes kanë një rrezik më të ulët për të vdekur nga sëmundjet kardiovaskulare dhe një rrezik më të ulët për vdekshmërinë e përgjithshme krahasuar me ata që pinë kafe gjatë gjithë ditës.
Hulumtimi u udhëhoq nga Dr. Lu Qi nga Universiteti Tulane, New Orleans, SHBA, shkruan European Society of Cardiology, përcjell Katror.info.
“Hulumtimet deri tani sugjerojnë se pirja e kafes nuk rrit rrezikun për sëmundje kardiovaskulare dhe duket se ul rrezikun për disa sëmundje kronike, siç është diabeti i tipit 2. Duke marrë parasysh efektet që ka kafeina në trupin tonë, dëshiruam të shqyrtonim nëse koha e ditës kur pini kafen ka ndonjë ndikim në shëndetin e zemrës”, tha ai.
Mundesh me e lexu edhe…
Studimi përfshiu 40,725 të rritur që morën pjesë në Anketën Kombëtare të Shëndetit dhe Ushqimit (NHANES) në SHBA, midis viteve 1999 dhe 2018.
Pjesëmarrësit u pyetën për të gjitha ushqimet dhe pijet që konsumonin për të paktën një ditë, përfshirë nëse pinin kafe, sa shumë dhe kur.
Gjithashtu, përfshiu një nën-grup prej 1,463 personash të cilëve u kërkua të plotësonin një ditar të detajuar ushqimesh dhe pijesh për një javë të tërë.
Hulumtuesit mundën të lidhin këto të dhëna me regjistrimet e vdekjeve dhe shkakut të vdekjes për një periudhë prej nëntë deri dhjetë vitesh.
Rreth 36% e njerëzve në studim ishin pirës të kafes në mëngjes (ata që kryesisht pinin kafe para mesditës), 16% pinin kafe gjatë gjithë ditës (në mëngjes, pasdite dhe mbrëmje), dhe 48% nuk pinin kafe.
Krahasuar me ata që nuk pinin kafe, pirësit e kafes në mëngjes kishin 16% më pak mundësi të vdisnin për çdo shkak dhe 31% më pak mundësi të vdisnin nga sëmundjet kardiovaskulare. Megjithatë, nuk u vu re asnjë ulje të rrezikut për ata që pinin kafe gjatë gjithë ditës krahasuar me ata që nuk pinin.
Pirësit e kafes në mëngjes përfitonin nga rreziku i ulur, qoftë ata që pinë një sasi të moderuar (dy deri tre filxhanë), ose ata që pinë shumë (më shumë se tre filxhanë). Pirësit e lehtë të kafes në mëngjes (një filxhan ose më pak) përfitonin nga një ulje më e vogël e rrezikut.
“Ky është studimi i parë që shqyrton modelet e kohës kur pihet kafe dhe rezultatet shëndetësore. Gjetjet tona tregojnë se nuk është thjesht çështje e se a pini kafe apo sa shumë pini, por koha e ditës kur e pini kafen është ajo që ka rëndësi. Ne zakonisht nuk japim këshilla rreth kohës në udhëzimet tona dietike, por ndoshta duhet të mendojmë për këtë në të ardhmen”, tha ai.
Ky studim nuk tregon pse pirja e kafes në mëngjes ul rrezikun e vdekjes nga sëmundjet kardiovaskulare. Një shpjegim i mundshëm është se konsumi i kafes pasdite ose mbrëmje mund të ndërhyjë në ritmet biologjike dhe nivelet e hormoneve si melatonina. Kjo mund të çojë në ndryshime në faktorët e rrezikut për sëmundjet kardiovaskulare, si inflamacioni dhe presioni i lartë i gjakut.
“Studime të mëtejshme janë të nevojshme për të vërtetuar gjetjet tona në popullata të tjera, dhe ne kemi nevojë për provat klinike për të testuar ndikimin e mundshëm të ndryshimit të kohës kur njerëzit pinë kafe,” shtoi ai.
Në një editorial të shoqëruar, Profesori Thomas F. Lüscher nga Spitalet Royal Brompton dhe Harefield, Londër, tha: “Në studimin e tyre të publikuar në këtë numër të European Heart Journal, Wang et al analizuan kohën e konsumimit të kafes nga 40,725 të rritur nga NHANES dhe 1,463 të rritur nga Studimi i Validimit të Stilit të Jetës së Grave dhe Burrave.
“Gjatë një periudhe të ndjekjes mesatare prej pothuajse një dekade, dhe pas rregullimit për konsumin e kafesë me dhe pa kafeinë, sasinë e filxhanëve për ditë, orët e gjumit dhe faktorët e tjerë, modeli i pirësve të kafes në mëngjes, në vend të atij që pinë kafe gjatë gjithë ditës, ishte i lidhur ndjeshëm me rrezikun më të ulët të vdekjes nga çdo shkak (me një raport rreziku prej 0.84) dhe vdekjen nga sëmundjet kardiovaskulare (me një raport rreziku prej 0.69) krahasuar me ata që nuk pinin kafe.
Pse mund të ketë rëndësi koha e ditës?
Gjatë orëve të mëngjesit zakonisht ka një rritje të madhe të aktivitetit simpatik kur zgjohemi dhe ngrihemi nga shtrati, një efekt që zbehet gjatë ditës dhe arrin nivelin më të ulët gjatë gjumit. Kështu, është e mundur që pirja e kafes pasdite ose mbrëmje ndërhyn në ritmin biologjik të aktivitetit simpatik. Në këtë kontekst, është interesante që kafeja duket të shtypë melatoninën, një mediator të rëndësishëm që indukon gjumin në tru.
“Përfundimisht, duhet ta pranojmë tani evidencën e konsiderueshme që pirja e kafes, sidomos gjatë orëve të mëngjesit, ka të ngjarë të jetë e shëndetshme. Pra, pini kafen tuaj, por bëjeni këtë në mëngjes”, këshillon ai./Katror.info
Përgatiti:
