Një nga mënyrat më të thjeshta dhe më të fuqishme për të përmirësuar mirëqenien mendore dhe fizike është aktiviteti fizik në natyrë dhe gjithnjë e më shumë studime po e vërtetojnë këtë.
Kur keni bërë shëtitjen tuaj të fundit në natyrë, çfarë keni ndier?
Ndoshta rrezet e diellit që depërtonin mes gjetheve të reja, këngën e zogjve, ujin e ftohtë të një përroi që ju freskonte majat e gishtave, apo aromën e një peme pishe kur kalonit pranë saj. Nëse keni përjetuar ndonjërën nga këto, me shumë gjasë keni ndier edhe një ndjenjë qetësie që përfshinte mendjen dhe trupin. Dhe kjo nuk është rastësi, shkruan Positive News, transmeton Katror.info.
Studime të shumta tregojnë se lidhja me natyrën ka efekte pozitive të menjëhershme: ul nivelin e hormoneve të stresit si kortizoli dhe adrenalina, redukton tensionin e gjakut dhe lehtëson simptomat e ankthit e depresionit.
Mundesh me e lexu edhe...
Madje, aktiviteti fizik në natyrë ajo që studiuesit e quajnë “ushtrime të gjelbra”, rezulton të jetë më i dobishëm për mirëqenien sesa ushtrimet në ambiente të mbyllura apo urbane.
Pse ndikon kaq fuqishëm natyra?
“Sepse ne jemi zhvilluar në bashkëjetesë me natyrën,” shpjegon Kate Whyatt, një ekoterapiste në Nottinghamshire, MB, e cila, pas më shumë se një dekade në kujdesin social për të rriturit, u certifikua në këtë fushë në vitin 2023.
Sipas saj, natyra na rikthen ndjesinë e qetësisë, të përkatësisë dhe të të qenurit “në shtëpi”. “Ajo na ofron një hapësirë për të reflektuar, për t’u hapur dhe për t’u lidhur me veten,” thotë Whyatt.
Një nga efektet më të vlefshme të qëndrimit në natyrë është ajo që Whyatt e përshkruan si “shkëputje nga rripi lëvizës i mendimeve të vazhdueshme”. Në natyrë, truri lodhet më pak, arrin një farë pauze, dhe kjo hap rrugë për një rikthim më të shëndetshëm në përditshmëri me më shumë qartësi, produktivitet dhe balancë mendore.
Pushime për shpirtin dhe trupin
Për shumë njerëz, pushimet janë mundësia e vetme për t’u rimbushur dhe për të rikthyer ekuilibrin. Kjo është arsyeja pse gjithnjë e më shumë udhëtarë po zgjedhin të përfshijnë elemente të “shërimit përmes natyrës” në eksperiencat e tyre.
Një nga ofruesit më të vjetër të pushimeve ecëse në Europë, Inntravel, i është përkushtuar këtij qëllimi për më shumë se 40 vjet. Kompania ka krijuar itinerare të kuruara me kujdes, që udhëtarët të mund të eksplorojnë natyrën në ritmin e tyre, pa stresin e planifikimit.
Rebecca Bruce, specialiste për destinacione si Franca, Zvicra dhe Portugalia, thotë se lëvizja ritmike e ecjes ndihmon në qetësimin natyror të mendjes.
“Je i zhytur në natyrë, në gjithçka që të rrethon. Nuk ke pse mendon për gjë tjetër vetëm për atë që ndodhet përpara teje,” thotë ajo.
Udhëtimet ecëse të Inntravel shpesh përfshijnë atraksione të fshehura dhe vende të paprekura nga turizmi masiv.
“Ne kujdesemi që përvoja të jetë sa më e pasur vizualisht dhe emocionalisht,” shton Bruce.
Kur kujdesesh për natyrën, ajo kujdeset për ty
Përveç përfitimeve personale, lidhja me natyrën nxit edhe ndjeshmërinë ndaj mjedisit.
Hulumtimet tregojnë se njerëzit që kalojnë më shumë kohë në natyrë kanë më shumë gjasa të jenë të vetëdijshëm për çështjet mjedisore dhe të angazhohen në mbrojtjen e planetit. Qëndrueshmëria, për këtë arsye, është në zemër të filozofisë së Inntravel.
Për shembull, udhëtimi “Bavarian Wander” në Gjermaninë jugore përfshin qëndrime në Biohotel Eggensberger, një hotel që u bë organik në 2003 dhe neutral ndaj klimës në 2010.
Ndërsa në Slloveni, udhëtarët mund të eksplorojnë “Luginën Magjike të Logarit”, duke qëndruar në Hotel Plesnik, fitues i shumë çmimeve për përkushtimin ndaj qëndrueshmërisë. Të dy hotelet ofrojnë aktivitete shtesë si joga dhe qendra spa për një çlodhje të plotë trup-mendje.
Kur ecja bëhet shërim
Për Sally dhe Dave McEwen, një çift i pensionuar nga Oxfordshire jugore, ky verë do të jetë e para me Inntravel, në një udhëtim në Norvegji. Të dy kanë bërë më parë pushime ecjeje dhe e vlerësojnë thellësisht ndikimin e tyre.
“Të mbash trupin në lëvizje, të marrësh frymë në ajër të pastër – janë gjëra të thjeshta, por me ndikim të madh,” thotë Sally, e cila drejton një grup javor për ecje nordike. “Dhe pastaj ka edhe ndikimin mendor: të jesh jashtë, në pyll apo në fusha, të ngre shpirtin.”
Dave e përmbledh bukur: “Kur je në natyrë, nuk ka rrjete sociale, as lajme që të trullosin. Ka vetëm një pemë që ka çelur papritur ose një zë i ri zogu. Është ajo ndjesia se je më në paqe me veten dhe me botën përreth.”/Katror.info
Përgatiti:
