Sanduiçët e ftohtë janë nji prej mënyrave me t’lehta, t’shpejta dhe t’shijshme me i përgatitë diçka vehtës apo t’tjerëve pa pasë nevojë për me u kijametavë shumë n’kuzhinë. Pak rriska buke e pak prej harxhit që t’ka qëllu n’kuzhinë zakonisht mjaftojnë që me dal diçka e ngopshme dhe me shije. E ne, si adhurues/e të sanduiçëve vazhdimisht po jemi n’kërkim bash t’qityne recetave që s’lupin fort harxh e as punë, por që t’kënaqin fort.
Sanduiçin me kastraveca kësaj radhe po ua dedikojmë meraklive t’ushqimit t’thjeshtë e freskues. E nëse je njani/a prej tyre, atëherë këtë sanduiç mundesh lehtë e shpejt me e ba gati, qoftë për mëngjes, apo edhe për pauzë. Madje edhe fëmijëve mundesh me ua ba gati për shkollë, ose mundesh me i servu këto kafshat kur fton mysafir e gostitë ndejë. Mjafton me i ndjekë udhëzimet e maposhtme.
PËRBËRËSIT (servimi për 2):
6 feta bukë të bardhë tosti
200 gr krem-djathë
1/2 lugë kopër t’thatë
1/4 lugë hudhër pluhur
1/4 lugë kripë
1/4 lugë biber i zi
2 lugë gjelle lang limoni
1 qepë e re (e prerë imët)
1 kastravec anglez / katravec i çfarëdoshëm
HAPI 1:
Vendosi rriskat e bukës n’tepsi me letër dhe vendosi n’frigorifer për 1 orë me u ftohë, n’mënyrë që buka me u pre ma lehtë dhe pa trosha, por edhe me qenë sanduiçi sa ma freskues.
Mundesh me e lexu edhe…
HAPI 2:
Pak para servimit shto n’pjatë t’thellë krem-djathin bashk me erëzat dhe qepën e re t’grirë dhe përzije sasinë mirë, deri sa t’duket e njitrajtshme masa.
HAPI 3:
Qëro kastravecin dhe preje n’rriska mesatarisht t’holla atë. Ne t’këshillojmë me përdorë kastravec anglez, meqë ka ma pak fara dhe asht ma “Kërrc”, por padiskutimisht çdo lloj i kastravecit shkon me këtë recetë – mjafton me qenë i freskët.
HAPI 4:
Nxjerri rriskat e bukës prej frigoriferit, shto n’secilën rriskë nga 1 e 1/2 lugë gjelle prej miksit me krem-djathë dhe lyji bukët mirë. N’njanën prej rriskave shto kastravecat e renditun sipër njani tjetrit dhe vendos rriskën tjetër t’bukës sipër. Njilloj vepro edhe me rriskat e tjera.
HAPI 5:
Sigurohu që sanduiçi ka kanë stabil. Merr thikën dhe largo koret e bukës n’4 anët e sanduiçit. Ndaje n’trekandësh dhe servo.
REZULTATI:
Haje sanduiçin menjiherë, apo mbështjelle n’letër gatimit ose folie alumini e vendose n’frigorifer e merre me vehte n’punë apo baja gati fëmijëve për shkollë. Sanduiçin mundesh me e shoqnu me nji lang t’freskët t’mollës t’gjelbër t’cilin mundesh me e përgatitë vet sa hap e mbyll sytë, me e paketu n’shishe t’xhamit e me marrë me vehte, apo me nji smoothie me ananas dhe qershia.
E mbasi veç jemi te sanduiçët e shijshëm, t’mirë, t’lehtë e t’përshtatshëm për pauzë, mos e le pa e provu sanduiçin klasik me sallatë vezësh, sanduiçin me pesto dhe mocarellë, ose sanduiçin mediteran.
Ndërkaq, nëse je t’u i përgatitë këta sanduiça për ndonji aheng ose thjeshtë kur gostitë mysafir, mos harro me i shtu secilit trekandësh nga nji rriskë kastravec dhe pak oregano sipër për dekorim dhe ekstra shije. Shijo! /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria
Përgatiti:
