Nëse veç je ka i shqyrton opsionet se çka me përgatitë për drekë a darkë, ne e kemi nji super-recetë për ty edhe jemi t’bindun që po e provove, ke me e përgatitë ma shpesh se sa që mundet me ta marrë mendja. E ti që je vegjetarian/e ke dyfish ma shumë arsye me supën e thjerrëzave me domate, sepse asht vegjetariane plotësisht.
Ideale për drekë a darkë, supa me thjerrëza dhe domate asht e pasun me vlera ushqyese t’bollshme, por asht edhe plot shije. Përzierja e thjerrëzave me domatet, perimet dhe erëzat t’cilat zihen bashk arrijnë me e kriju nji pjatë t’nxehtë unike e që s’don shumë mund. E nëse don me ta fshi edhe tjerët pjatën deri n’fund, mjafton me i ndjekë 4 hapat e maposhtëm.
PËRBËRËSIT:
2 lugë gjelle vaj ulliri
1 qepë (e prerë imët)
3 karota (t’prera n’kubëza)
2 thelpinj hudhër (t’prera imët)
1 patate (e prerë n’kubëza)
2 lugë gjelle pastë domatesh
150 gr domate t’konservume
1 gotë thjerrëza t’kafëta
½ lugë biber i zi
½ lugë borzilok i thatë
½ lugë gjelle oregano
4 gota supë perimesh (700 ml ujë i vluar + 2 kubëza vegjetariane)
2 lugë gjelle salcë soje
Gjethe t’freskëta magdanozi (Opsionale)
HAPI 1:
N’tenxhere t’nxehtë shto vajin e ullinit, qepën, hudhrën dhe karrotat. Fërgoji ato për 5 minuta.
HAPI 2:
Shto pastën e domateve n’tenxhere dhe kavërdise masën për 1 minut.
HAPI 3:
Shto n’tenxhere thjerrëzat, domatet e konservume, patatet dhe supën e përgatitun me kubëzat e supës. Shto edhe erëzat e përzije masën mirë.
HAPI 4:
Zije supën me thjerrëza dhe perime 40-50 minuta, largo nga shporeti dhe servo me pak magdanoz t’freskët sipër.
REZULTATI:
Servoje çorbën n’pjatë e shoqnoje me bukë ose pitalka t’nxehta, apo edhe me bukë bajate t’rreshkun n’furrë. E mbasi veç jemi tek qorbat plot shije, mos e le pa e provu edhe çorbën me perime, apo supën me thjerrëza dhe limon, supa t’cilat njilloj sikurse edhe supa me thjerrëza dhe domate janë plotësisht vegjetariane/vegane, apo nëse ke qejf mish e t’ka tepru pulë, provoje çorbën me pulë e thjerrëza.
Edhepse jo çorbë, por pjatë interesante me u përgatitë gjatë darkës – patatet e mbushura me kashkavall janë patatet që ne t’i rekomandojmë me i përgatitë t’u i ndjekë veç 2 hapa tanësisht t’lehtë e t’thjeshtë bashk me qoftet greke – mjafton me kliku n’fjalët që i kemi hijezu për ty. Shijo! /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria