Ka filluar sot edicioni i gjashtëmbëdhjetë i konferencës vjetore shkencore “Java e Albanologjisë” në Institutin Albanologjik të Prishtinës, në të cilin do të marrin pjesë 107 studiues nga rajoni dhe bota.
Gjatë kësaj jave, do të zhvillohen pesë sesione tematike që mbulojnë fusha qenësore të dijes shqiptare: historinë, folklorin dhe etnomuzikologjinë, letërsinë, etnologjinë dhe gjuhësinë, shkruan Kosovapress.
Ushtruesi i detyrës së drejtori i Institutit Albanologjik, Naim Berisha, tha se Java e Albanologjisë është shndërruar në një traditë të qëndrueshme dhe hapësirë shkencore për paraqitje dhe analizë të arritjeve në albanologji.
Në këtë hapje i pranishëm ishte edhe kryeministri në detyrë, Albin Kurti, i cili shtoi se si në të kaluarën dhe tash dijet albanologjike ballafaqohen me sfida të caktuara.
E Ambasadori i Shqipërisë në Kosovë, Petrit Malaj, u shpreh se kjo javë është thirrje e kujtesës kolektive dhe nxitje për të avancuar në fusha në të ardhmen.
Konferenca u hap sot me Sesionin e Historisë, me temën: “Ndërthurja e identitetit fetar te shqiptarët nga besimet pagane te pluralizmi bashkëkohor”. Studiuesit trajtuan mënyrën se si identiteti fetar ndërtohet dhe ndryshon në hapësirat shqiptare përmes kohëve, duke prekur tema të ndërlidhura me historinë, kulturën dhe përkatësinë shpirtërore të shqiptarëve.
Ky edicion do të zgjasë nga 26 deri më 30 maj 2025./Katror.info
