Artisti Besart Zhuja ka publikuar albumin e tij më të ri, të titulluar “Kangë t’vogla”, një koleksion prej 12 këngësh të shkurtra origjinale, të cilat sjellin ndjeshmëri, intimitet dhe imagjinatë në një formë minimaliste, por të thellë artistikisht, shkruan Katror.info.
Albumi përfaqëson një udhëtim të qetë emocional, i frymëzuar nga përditshmëria dhe momentet e vogla që shpesh kalojnë pa u vërejtur, por që mbartin emocione të mëdha. Zhuja tregon se ideja për këtë projekt nisi pas një dhurate simbolike – një piano nga nëna e tij – që e riktheu në lojën me muzikën dhe në procesin krijues.
“Nisa kadal kadale me i knu do tekste që i kisha shkru, e tu provu me i sintetizu ato me do harmoni t’muzikës”, shprehet Zhuja.
Mundesh me e lexu edhe…
Produksioni muzikor, mixi dhe masteri janë realizuar nga Lis Boshtrakaj – Boshtra Art House, ndërsa për videoproduksionin është kujdesur Katror Media.
“Kangë t’vogla” i shmang klishetë muzikore, duke synuar që çdo mesazh të përcillet qartë, pa nevojën e përsëritjes. Zhuja përshkruan procesin si të vështirë por të këndshëm, një përballje e vazhdueshme me dyshimet dhe bindjet krijuese që karakterizojnë çdo artist.
Albumi tashmë është i disponueshëm për dëgjim në pothuajse të gjitha platformat muzikore digjitale./Katror.info
