Pas një pritjeje të gjatë prej 16 vitesh, ëndrra e fansave u bë realitet: Oasis u rikthyen më në fund në skenë dhe e bënë këtë në mënyrën më madhështore të mundshme, shkruan Billboard, përcjell Katror.info.
Pas 16 vitesh mungesë, grupi u rikthye në skenë duke tingëlluar më energjik dhe i rigjallëruar, dhe menjëherë ndezi atmosferën me këngët klasike “Cigarettes and Alcohol”, “Live Forever” dhe “Slide Away”, ndërsa mbi 70 mijë fansa këndonin, përqafoheshin dhe shpërthenin nga emocionet.
Ata e paralajmëruan ribashkimin që në gusht të vitit të kaluar me një mesazh të shkurtër: “Yjet janë rreshtuar. Ejani dhe shihni kjo mrekulli nuk do të transmetohet në TV.” Dhe kështu ndodhi.
Mundesh me e lexu edhe…
Me 41 data koncertesh të konfirmuara, prej të cilave 19 në Mbretërinë e Bashkuar dhe Irlandë, turneu është ndër më të mëdhenjtë në historinë e grupit.
Koncerti në Cardiff shënoi rikthimin e parë të Oasis pas ndarjes së bujshme në vitin 2009, kur një përplasje mes Noel dhe Liam çoi në shpërbërjen e menjëhershme të grupit. Por më 4 korrik 2025, ata u ngjitën në skenë dorë për dore – të ribashkuar dhe të gatshëm për të nisur një kapitull të ri.
Këto janë 9 momentet më të veçanta të koncertit të rikthimit të ‘Oasis’ në Cardiff:
1. Djemtë u rikthyen në qytet
Si mund të niste ndryshe koncerti, nëse jo me “F—in’ in the Bushes”? Ky instrumental shpërthyes nga viti 2000 ka shërbyer për vite me radhë si himni i hyrjes së grupit në skenë. Sapo filloi të dëgjohej në stadium, publiku shpërtheu në brohoritje. Noel dhe Liam ecën dorë për dore drejt skenës, ndërsa në sfond shfaqeshin titujt e lajmeve që paralajmëronin ribashkimin e tyre. Ishte një moment që u ndje si një rikthim në kohët e lavdisë.
2. “Na duhemi njëri-tjetrit”
Pas hyrjes, kënga e parë e plotë që kënduan ishte “Hello,” por ajo që emocionoi më shumë ishte “Acquiesce”, e cila erdhi menjëherë pas saj. Të dy vëllezërit ndanin vokalet kryesore, një moment që konfirmoi realitetin e këtij ribashkimi. Emocione deri në palcë.
3. Tinguj që trondisin
Oasis gjithmonë ka qenë grup me zë të fuqishëm, por në këtë koncert ata tingëlluan jashtëzakonisht fort. Me çatinë e mbyllur të stadiumit dhe kapacitetin maksimal prej 74,500 personash, çdo centimetër u mbush me zë. “Bring It On Down” solli atë energjinë e ashpër të ditëve të para të grupit, ndërsa “Cigarettes & Alcohol” ishte një grusht i vërtetë rock.
4. Mall i pastër
Oasis nuk ka qenë kurrë për elitizma – ata janë për të gjithë.
Në këngën “D’You Know What I Mean?”, Liam përshëndeti “të gjithë njerëzit e mi, këtu dhe tani”, duke krijuar një ndjenjë përfshirjeje të thellë. Kjo lidhje u theksua edhe më tej me këngën “Fade Away”, një B-side nga viti 1994 që përshkruan fëmijërinë e tyre në Manchester. Liam pyeti nëse dikush nga publiku vinte nga Burnage, lagjja e tyre, dhe përgjigja ishte një valë e fuqishme brohoritjesh. Në fund, Noel ia dedikoi “The Masterplan” të rinjve 20-vjeçarë që kurrë më parë nuk e kishin parë grupin live – një kujtesë se Oasis mbeten një himn i përjetshëm i rinisë.
5. Magjia e Noel-it
Askush nuk e vë në dyshim talentin e Noel Gallagher si kantautor. Ai këndoi tri këngë solo: “Talk Tonight”, “Half the World Away” dhe “Little by Little”. E para është një nga më personale që ka shkruar ndonjëherë, krijuar gjatë një fundjave të errët në SHBA në vitin 1995, kur një grua e panjohur e ndihmoi të rigjejë kuptimin e jetës. Një moment intim në mes të një stadiumi gjigant.
6. Shakatë s’kishin si të mungonin
Që nga njoftimi i ribashkimit, dy vëllezërit kishin mbajtur heshtje. Por në skenë, ata nuk e përmbajtën dot veten. Noel bëri shaka për çmimet “dinamike” të biletave që kishin tmerruar fansat, ndërsa Liam pyeti turmën: “Ia vlejti 40,000 funtat që paguat për të hyrë?” dhe turma shpërtheu në të qeshura. Kur prezantonte anëtarët e bendit, Noel e quajti bateristin e ri Joey Waronker si “bateristin tonë të katërmbëdhjetë… dhe shpresoj, të fundit!”
7. Një homazh prekës
Kënga “Live Forever” u shndërrua në një moment kujtese. Në fund të saj, banda i bëri homazh futbollistit të Liverpool-it, Diogo Jota, i cili humbi jetën tragjikisht në një aksident automobilistik vetëm një ditë para koncertit. Ndonëse Oasis janë fansa të Manchester City-t, ky moment la mënjanë rivalitetin sportiv dhe nderoi një jetë të humbur shumë herët – një baba, bashkëshort dhe sportist vetëm 28 vjeçar.
8. “BEE Here Now”
“Don’t Look Back in Anger” është bërë një himn alternativ për anglezët, një thirrje për të mbajtur shpresën gjallë. Pas sulmit terrorist në koncertin e Ariana Grande në Manchester në vitin 2017, kjo këngë u shndërrua në simbol të rezistencës dhe qëndrueshmërisë së komunitetit.
Të premten mbrëma, në sfondin e këngës u shfaqën bletë, simboli i qytetit të Manchesterit. Noel nuk kishte nevojë të këndonte refrenin, publiku e këndoi me gjithë shpirt, duke mbuluar çdo tingull tjetër.
9. Një lamtumirë e përkryer
Tradicionalisht, koncertet e Oasis mbylleshin me një version të “I Am The Walrus” nga The Beatles. Por këtë herë, ata e mbyllën me kryeveprën e tyre “Champagne Supernova”.
Një mbyllje madhështore për një mbrëmje që do të mbetet në histori. Në momentin që Noel dhe Liam dolën nga skena dhe u përqafuan sinqerisht, stadiumi shpërtheu në brohoritje. Por ky nuk ishte thjesht një koncert. Ishte një rikthim i shumëpritur, një pajtim i shumëkërkuar dhe një dëshmi se muzika ka fuqinë të shërojë gjithçka. /Katror.info
Përgatiti:
