Gjykata Kushtetuese ka shpallur të pavlefshëm tre paragrafë të nënit 331 të Kodit Doganor dhe të Akcizave që në Kushtetuese ishte dërguar nga Avokati i Popullit, meqë të njëjtit nuk ishin në përputhjeje me Kushtetutën.
Në vendimin e Kushtetueses thuhet se paragrafët 4, 5 e 6 të nenit 331 që ka të bëjë me emërimet dhe mandatin e pozitave drejtuese, u shpallën njëzëri të pavlefshëm, por është refuzuar kërkesa për masë të përkohshme.
Ndërkohë, për dy paragrafët tjerë, paragrafin 2 dhe 7 në po të njëjtit nen, 331 të Kodit Doganor dhe të Akcizave, thotë se nuk janë në kundërshtim me kushtetutën.
Mundesh me e lexu edhe…
“Gjykata Kushtetuese e Republikës së Kosovës ka vendosur në rastin KO234/24, lidhur me vlerësimin e kushtetutshmërisë së paragrafëve 2, 4, 5, 6 dhe 7 të nenit 331 (Emërimi dhe mandati i pozitave drejtuese) të Kodit nr. 08/L-247 Doganor dhe të Akcizave, të parashtruar nga Avokati i Popullit, bazuar në përcaktimet e nënparagrafit 1 të paragrafit 2 të nenit 113 [Jurisdiksioni dhe Palët e Autorizuara] të Kushtetutës së Republikës së Kosovës. Gjykata, ka vendosur njëzëri (i) të deklarojë kërkesën e pranueshme; dhe të konstatojë që: (ii) paragrafi 2 i nenit 331 (Emërimi dhe mandati i pozitave drejtuese) të Kodit Doganor dhe të Akcizave, Nr. 08/L-247, nuk është në kundërshtim me paragrafin 1 të nenit 3 [Barazia para Ligjit] dhe paragrafin 1 të nenit 7 [Vlerat] të Kushtetutës; (iii) që paragrafët 4, 5 dhe 6 të nenit 331 (Emërimi dhe mandati i pozitave drejtuese) të Kodit Doganor dhe të Akcizave, Nr. 08/L-247 nuk janë në përputhshmëri me paragrafin 1 të nenit 3 [Barazia para Ligjit] dhe paragrafin 1 të nenit 7 [Vlerat] të Kushtetutës; (iv) paragrafi 6 i nenit 331 (Emërimi dhe mandati i pozitave drejtuese) të Kodit Doganor dhe të Akcizave, Nr. 08/L- 247 nuk është në përputhshmëri me nenin 46 [Mbrojtja e Pronës] të Kushtetutës; (iv) paragrafi 7 i nenit 331 (Emërimi dhe mandati i pozitave drejtuese) të Kodit Doganor dhe të Akcizave, Nr. 08/L-247, nuk është në kundërshtim me paragrafin 1 të nenit 3 [Barazia para Ligjit] dhe paragrafin 1 të nenit 7 [Vlerat] të Kushtetutës; (v) të shpallë njëzëri, të pavlefshëm paragrafët 4, 5 dhe 6 të nenit 331 (Emërimi dhe mandati i pozitave drejtuese) të Kodit Doganor dhe të Akcizave, Nr. 08/L-247; dhe (vi) të refuzojë kërkesën për masë të përkohshme”, thuhet në njoftimin e Kushtetueses.
Thelbi i pretendimeve të parashtruesit të kërkesës, pra Avokatit të Popullit, sipas Gjykatës Kushtetuese ndërlidhet me përmbajtjen e nenit 331 (Emërimi dhe mandati i pozitave drejtuese) të Kodit Doganor dhe të Akcizave, sipas të cilit ndryshohet statusi i marrëdhënies së punës për pozitat drejtuese në Doganën e Kosovës, nga marrëdhënie pune me afat të pacaktuar në marrëdhënie me afat të caktuar dhe sipas të cilës dispozitë, cenohet siguria juridike, pritshmëritë legjitime dhe të drejtat e fituara të punonjësve në këto pozita, në kundërshtim me nenin 7 [Vlerat] dhe nenin 46 [Mbrojtja e Pronës] të Kushtetutës.
“Për më tepër, parashtruesi i kërkesës thekson se neni 331 (Emërimi dhe mandati i pozitave drejtuese) i Kodit të kontestuar është i ngjashëm me paragrafin 2 të nenit 99 (Dispozitat kalimtare) të Ligjit nr. 08/L-197 për Zyrtarët Publikë, i cili ishte shfuqizuar nga Gjykata Kushtetuese përmes Aktgjykimit në rastet e bashkuara KO216/22 dhe KO220/22”, thuhet tutje në vendim.
Këto pretendime të parashtruesit ishin kundër argumentuar nga Ministria e Financave Punës dhe Transfereve, e cila në komentet e saj të dorëzuara në Gjykatë, ka theksuar se kufizimi i mandatit të pozitave drejtuese në Doganën e Kosovës nuk paraqet ndërhyrje në të drejtën e pronës, pasi sipas tyre vet pozita nuk përbën të drejtë pronësore.
“Ministria e Financave Punës dhe Transfereve në komentet e saj, tutje thekson se të drejtat ekonomike, përfshirë pagën, mbeten të paprekura edhe në rast të sistemimit në një pozitë tjetër me pagë të njëjtë. Prandaj, sipas Ministrisë së Financave Punës dhe Transfereve, përderisa nuk ka pasur kufizim në gëzimin paqësor të të drejtës së pronës, nuk mund të konstatohet shkelje e nenit 46 [Mbrojtja e Pronës] të Kushtetutës”, thuhet ndër të tjera në këtë vendim./RTK/Katror.info
